पुणे : कौटुंबिक वाद विकोपाला गेल्यानंतर गावठी पिस्तुलातून झाडलेली गोळी पतीच्या छातीत घुसल्याची धक्कादायक घटना कसबा पेठेत सोमवारी सकाळी घडली. अभिजीत शिंगोटे (३३) हे गंभीर जखमी झाले असून, गोळी पत्नीने झाडली की पतीने आत्महत्येचा प्रयत्न केला, याबाबत दोघांकडून परस्परविरोधी दावे करण्यात आल्याने पोलिसांसमोर घटनेचे गूढ कायम आहे.
कसबा पेठेतील गोकुळे वाडा परिसरात शिंगोटे हे भाड्याने राहतात. त्यांचा मोबाइल दुरुस्तीचा व्यवसाय आहे. पत्नीपासून घटस्फोटाची प्रक्रिया सुरू असून, त्यांची दोन्ही मुले आजोळी राहतात. दोन दिवसांपूर्वी पत्नी पतीकडे आली होती. सोमवारी सकाळी दोघांमध्ये वाद झाल्यानंतर गोळीबार झाला.
छातीवर गोळी लागल्यानंतर शिंगोटे यांनी दुकानातील एका कामगाराला घरी बोलावून घेतले. त्याच्या दुचाकीवरून ते ससून रुग्णालयात गेले. त्यानंतर त्यांना खासगी रुग्णालयात दाखल करण्यात आले असून उपचार सुरू आहेत.
दरम्यान, शेजाऱ्यांनी पोलिसांना माहिती दिल्यानंतर फरासखाना पोलिस घटनास्थळी दाखल झाले. घरातून गावठी पिस्तूल आणि एक पुंगळी पोलिसांना मिळाली. मात्र, गोळीबार नेमका कसा झाला, याचा उलगडा अद्याप झालेला नाही.
पत्नीने पतीने आत्महत्येचा प्रयत्न केल्याचा दावा केला आहे, तर जखमी पतीने पत्नीने आपल्यावर गोळी झाडल्याचे पोलिसांना सांगितले. त्यामुळे गोळीबाराचा प्रत्यक्ष साक्षीदार नसताना पोलिस तपास, घटनास्थळावरील पुरावे आणि तांत्रिक तपासातूनच सत्य बाहेर येणार आहे. सायंकाळपर्यंत गुन्हा दाखल करण्याची प्रक्रिया सुरू होती.
घरातील वाद हातघाईपर्यंत पोहोचणे गंभीरच; पण त्यात थेट बंदुकीचा वापर होणे ही कायदा-सुव्यवस्थेसाठीही धोक्याची घंटा आहे.
