छत्रपती संभाजीनगर: छत्रपती संभाजीनगरमधील छावणी परिसरात एका कपड्याच्या दुकानाला भीषण आग लागल्याची घटना घडली आहे. या घटनेत दुकानाच्या वरील मजल्यावर राहणाऱ्या सात जणांचा गुदमरून मृत्यू झाला आहे. मृतांमध्ये तीन महिलांसह दोन मुलांचा समावेश आहे. पहाटे तीन वाजण्याच्या सुमारास ही घटना घडली. आग लागलेले कपड्याचे दुकान छावणी दाना बाजार गल्लीतील महावीर जैन मंदिरच्या बाजूला आहे. किंग स्टाईल टेलर्स असे या कापड दुकानाचे नाव आहे.
छत्रपती संभाजीनगर शहरातील छावणी परिसरात जैन मंदिराजवळ असलेल्या एका तीन मजली इमारतीला अचानक आग लागली. या आगीत एकाच कुटुंबातील सातजण मृत्युमुखी पडल्याची माहिती सोमर येत आहे. सदर घटनेची माहिती मिळताच पोलिस आणि अग्निशमन दलाने घटनास्थळी धाव घेतली. मात्र, तोपर्यंत सातजणांचा गुदमरून दुर्दैवी मृत्यू झाला होता. त्यानंतर सर्वांचे मृतदेह शासकीय घाटी रुग्णालयात पाठवण्यात आले असून पोलिसांकडून पंचनामा केला जात आहे. आसिम वसीम शेख (वय-3), परी वसीम शेख (वय- 2), वसीम शेख (वय-30), तन्वीर वसीम (वय- 23), हमीदा बेगम (वय-50), शेख सोहेल (वय- 35), रेश्मा शेख (वय -22) असे मृत्युमुखी पडलेल्यांची नावे आहेत.
आग लागलेल्या या इमारतीत एकूण 16 लोक होते. पहिल्या आणि दुसऱ्या मजल्यावर 7 लोक होते. तर तिसऱ्या मजल्यावर 2 लोक होते. या आगीत दुसऱ्या मजल्यावरील सर्व सात लोकांचा मृत्यू झाला आहे. दरम्यान, इमारतीला आग लागल्याची माहिती मिळताच तातडीने अग्निशामक दलाला पाचारण करण्यात आले. त्यानंतर अग्निशामक दलाच्या अथक प्रयत्नानंतर आगीवर नियंत्रण मिळवण्यात यश आले आहे. मात्र, तोपर्यंत कपड्याचे दुकान पूर्णपणे जळून खाक झाले होते. तसेच सात जणांचा मृत्यू देखील झाला होता. सदर घटनेत अग्निशमाक दलाचा एक जवान देखील जखमी झाला आहे.
