बीड : परळी मतदारसंघामधून एक धक्कादायक बातमी समोर आली आहे. या मतदार संघात शरद पवारांच्या राष्ट्रवादीच्या नेत्याला बेदम मारहाण केल्याची घटना घडली आहे. या घटनेनंतर आता धनंजय मुंडेंच्या कार्यकर्त्यांनी ही मारहाण केल्याचा आरोप करण्यात येत आहे. कारण मारहाणीनंतर कार्यकर्त्यांनी धनंजय मुंडे यांच्या नावाच्या घोषणा दिल्या होत्या. या घटनेचा व्हिडिओ सुद्धा व्हायरल होत आहे.
याबाबत अधिक माहिती अशी की, बीडच्या परळी मतदार संघात बोगस मतदान होत असल्याची माहिती शरद पवार गटाच्या नेत्याला मिळाली होती. यानंतर शरद पवार गटाचे नेते माधव जाधव हे परळी मतदार संघात बोगस मतदान रोखण्यासाठी गेले असता त्यांना मारहाण झाल्याची घटना घडली आहे.
व्हायरल व्हिडिओत काय?
व्हायरल व्हिडिओमध्ये दिसत आहे की, एक अज्ञात व्यक्ती माधव जाधव यांच्या थेट आंगावर येतो आणि त्यांना धक्काबुक्की करत कानशिलात लगावतो. यानंतर इतर कार्यकर्ते देखील माधव जाधव यांना बेदम मारहाण करताना दिसतात. त्यानंतर कार्यकर्ते माधव जाधव यांना मतदार संघातून हाकलून लावातात.
दरम्यान परळी मतदार संघात राष्ट्रवादी अजित पवार गट विरूद्ध राष्ट्रवादी शरद पवार गट अशी लढत होत आहे. परळीतून अजित पवारांच्या राष्ट्रवादीचे उमेदवार धनंजय मुंडे आणि शरद पवारांच्या राष्ट्रवादीचे उमेदवार राजेसाहेब देशमुख यांच्यात थेट लढत आहे. आता या मतदार संघातून कोण बाजी मारणार? हे मात्र निकालाच्या दिवशीच समजू शकणार आहे.
