छत्रपती संभाजीनगर: “घरबसल्या लाखो कमवा,” “गुंतवणूक करा आणि पैसे दुप्पट करा” अशा (Online Fraud) आकर्षक जाहिराती सध्या सोशल मीडियावर अक्षरशः थैमान घालत आहेत. मात्र, या अमिषामागे विनाशाचा अंधार दडला आहे, याचा प्रत्यय संभाजीनगरमधील एका घटनेने दिला आहे. एका 35 वर्षीय महिलेने ऑनलाईन गेमिंगच्या नादात तब्बल 4 लाख रुपये गमावले आणि या धक्क्यातून तिने थेट आत्महत्येचा प्रयत्न केला. सुदैवाने, वेळेवर उपचार मिळाल्याने तिचे प्राण वाचले असले तरी, या घटनेने ऑनलाईन गेमिंगच्या वाढत्या विळख्यावर प्रकाश टाकला आहे.

संबंधित महिला एका सामान्य कुटुंबातील आहे. काही महिन्यांपूर्वी एका जाहिरातीला भुलून तिने 500 रुपये टाकून गेम खेळायला सुरुवात केली. सुरुवातीला काही पैसे जिंकल्यामुळे तिला आणखी पैसे कमवावे असे वाटू लागले. हळूहळू 500 चे 5 हजार आणि 5 हजारचे 50 हजार कधी झाले, हे तिलाही समजले नाही. पैसे रिकव्हर करण्याच्या नादात तिने घरातील साठवलेले ४ लाख रुपये पणाला लावले आणि एका रात्रीत सर्वकाही गमावले.
इतकी मोठी रक्कम गमावल्याचे समजताच या महिलेची मानसिक स्थिती पूर्णपणे ढासळली. तिने लोकांशी बोलणे बंद केले आणि स्वतःला खोलीत कोंडून घेतले. सततचे नैराश्य आणि कुटुंबाला काय सांगायचे या भीतीने ती आत्महत्येचा विचार करू लागली. दरम्यान, कुटुंबीयांनी तिला तातडीने जिल्हा रुग्णालयातील मनोविकार विभागात दाखल केले. डॉक्टरने उपचार करून तिला पूर्णपणे बरे केले.







