छत्रपती संभाजीनगर : बीडकडून छत्रपती संभाजीनगरमार्गे पुणे येथे जात असलेल्या एका शॉर्पशुटरच्या स्थानिक गुन्हे शाखेच्या पोलिसांनी शनिवारी (दि.२६) पाचोड टोलनाक्यावर मुसक्या आवळल्या. हा कुख्यात गुंड पुण्यातील निलेश घायवळ या गँगचा शार्प शूटर असून त्याला पुणे ग्रामीण पोलिसांच्या स्वाधीन केल्याची माहिती पोलिसांनी दिली आहे. संतोष आनंद धुमाळ (४०, रा. खेचरे, ता. मुळशी) असे आरोपीचे नाव असून, त्याच्यावर पुणे येथील विविध पोलीस ठाण्यांत तब्बल १८ गंभीर स्वरूपाचे गुन्हे दाखल आहेत.
बीडवरून छत्रपती संभाजीनगरसाठी निघालेल्या एका काळ्या रंगाच्या स्कॉर्पिओतून एकजण गावठी कट्टा घेऊन जात असल्याची माहिती स्थानिक गुन्हे शाखेचे निरीक्षक सतीश वाघ यांना शनिवारी (दि.२६) मिळाली होती. त्यावरून त्यांनी संबधित गाडीची झडती घेण्याचे आदेश दिले. पाचोड टोल नाक्यावर संशयित गाडीचा चालक कुख्यात शार्प शूटर संतोष धुमाळ हा टोलनाक्यावरील कर्मचाऱ्यासोबत हुज्जत घालत होता. त्यावेळी त्याच्या मुसक्या आवळण्यात आल्या.
