हिंगोली : हिंगोली जिल्ह्यातील सेनगाव तालुक्यात उघडकीस (Hingoli News) आलेल्या एका खून प्रकरणाने खळबळ उडाली आहे. अनैतिक संबंधांमध्ये अडसर ठरणाऱ्या स्वतःच्या मुलाचाच आईने सुपारी देऊन खून (Hingoli Crime) केल्याचे तपासात समोर आले आहे. मात्र या संपूर्ण प्रकरणाचा उलगडा झाला तो मृत तरुणाच्या हातावरील टॅटूमुळे. (Latest Marathi News)
दोन दिवसांपूर्वी सेनगाव तालुक्यातील जामदया शिवारात एका अनोळखी तरुणाचा मृतदेह आढळला होता. चेहरा ओळखता येणार नाही अशा अवस्थेत असल्याने मृतदेहाची ओळख पटवणे पोलिसांसाठी मोठे आव्हान होते. अशा वेळी पोलिसांनी मृतदेहाचे फोटो सोशल मीडियावर प्रसारित केले.
या तरुणाच्या हातावर दोन ठळक टॅटू होते. एक टॅटू आई-वडिलांबद्दल होता, तर दुसरा एका पावलाचा टॅटू होता. याच टॅटूमुळे अखेर या मृतदेहाची ओळख पटली. मृत तरुणाचे नाव सचिन रामकिशन राजगुरू असून तो बुलढाणा जिल्ह्यातील लोणार तालुक्यातील वढव गावचा रहिवासी असल्याचे समोर आले.
ओळख पटताच पोलिसांनी पुढील तपास सुरू केला. तपासात धक्कादायक माहिती समोर आली. सचिनच्या आईचे गावातील रामदास तनपुरे याच्यासोबत अनैतिक संबंध होते. या संबंधांमध्ये सचिन अडथळा ठरत असल्याने त्याचा काटा काढण्याचा कट रचण्यात आला.
या कटानुसार आई आणि तिचा प्रियकर यांनी नरेश पवार याला 25 हजार रुपयांची सुपारी दिली. नरेश पवार याने सचिनला पाहुण्याकडे जाण्याचा बहाणा करून साखरा परिसरात नेले. तेथे त्याला भरपूर दारू पाजून मद्यधुंद केले आणि जामदया शिवारात निर्जन ठिकाणी नेऊन त्याच्या डोक्यात दगड टाकून खून केला.
मृतदेहाची ओळख लपवण्यासाठी चेहरा विद्रूप करण्यात आला होता. मात्र हातावरील टॅटूमुळेच या गुन्ह्याचा उलगडा झाला. पोलिसांनी या प्रकरणी आई, तिचा प्रियकर आणि सुपारी घेणाऱ्या आरोपीला अटक केली असून तिघांनीही गुन्ह्याची कबुली दिली आहे. या संपूर्ण प्रकरणात टॅटूच हा महत्त्वाचा पुरावा ठरला आणि त्याचमुळे पोलिसांना गुन्ह्याचा छडा लावता आला.
