जालना : संपूर्ण राज्यात मराठा आरक्षणाचा मुद्दा चांगलाच तापला आहे. जालना जिल्ह्यातील आंतरवाली सराटी येथे मराठा आंदोलक मनोज जरांगे पाटील हे आमरण उपोषणाला बसले आहेत. आज त्यांच्या आंदोलनाचा सातवा दिवस आहे. महाराष्ट्रभर मराठा आरक्षण आंदोलनाला हिंसक वळण लागलेलं आहे. अशातच आज कोल्हापूरचे श्रीमंत शाहू महाराज यांनी आंरवाली सराटीत उपोषणस्थळी जाऊन मनोज जरांगे पाटील यांची भेट घेतली. त्यावेळी शाहू महाराजांना शब्द देत, राजेंचा मान राखून दोन दिवस पाणी पिणार, दोन दिवसांत आरक्षण मिळालं नाहीतर पुन्हा पाणी सोडणार, असं जरांगे पाटील यांनी म्हटलं आहे.
महाराष्ट्रात मराठा आरक्षणाचा मुद्दा पेटला असताना श्रीमंत शाहू महाराजांनी आंतरवली सराटी येथे जाऊन मनोज जरांगे-पाटील यांची भेट घेतली. काही दिवसांपूर्वी माजी खासदार संभाजी राजे छत्रपती यांनी भेट घेतल्यानंतर आज कोल्हापूरचे श्रीमंत शाहू महाराज मनोज जरांगे-पाटील यांची भेट घेतली. त्यावेळी बोलताना शाहू महाराजांनी सरकारला आपला शब्द ऐकावाच लागेल, असं स्पष्टपणे सांगितलं. तसेच मनोज जरांगेंना तब्येतीची काळजी घेण्याची विनंती शाहू महाराजांनी केली.
