छत्रपती संभाजीनगर : शिवसेना शिंदे गटाचे मंत्री अब्दुल सत्तार यांच्या वाढदिवसानिमित्ताने आयोजित करण्यात आलेल्या गौतमी पाटीलच्या कार्यक्रमात लाठीचार्ज करण्यात आला आहे. सिल्लोडमध्ये बुधवारी गौतमी पाटीलचा कार्यक्रम सुरू असताना काही तरुणांनी हुल्लडबाजी सुरु केली,. यामुळे संतापलेल्या मंत्री अब्दुल सत्तारांनी पोलिसांना लाठीचार्ज करण्याचे आदेश दिले. पोलिसांनी मंत्री अब्दुल सत्तार यांच्या आदेशानंतर लाठीमार देखील केला. सर्वात धक्कादायक बाब म्हणजे कार्यक्रमात गोंधळ घालणाऱ्या लोकांना कुत्र्यासारखं मारा, त्यांचं कंबर मोडा, एक हजार पोलिसांचा बंदोबस्त असून, पन्नास हजार लोकांना मारायला काय हरकत आहे, असेही सत्तार म्हणाले.
नेमकं प्रकरण काय ?
मंत्री अब्दुल सत्तार यांच्या वाढदिवसानिमित्ताने सिल्लोड येथे गौतमी पाटीलच्या कार्यक्रमाचे आयोजन करण्यात आले होते. हा कार्यक्रम सुरू झाल्यानंतर समोर बसलेल्या काही तरुणांनी हुल्लडबाजी करण्यास सुरुवात केली. त्यामुळे कार्यक्रम लागलीच थांबवावा लागला. यानंतर मंत्री अब्दुल सत्तार माईक घेऊन थेट स्टेजवर आले. त्यांनी पोलिसांना गोंधळ घालणाऱ्या तरुणांना आवर घालण्याच्या सूचना दिल्या. मात्र, तरुण काही केल्या ऐकायला तयार नव्हते. मग काय सत्तार यांचा पारा चढला आणि त्यांनी पोलिसांना थेट लाठीचार्ज करून गोंधळ घालणाऱ्या तरुणांना जेलमध्ये टाकण्याचे सूचना दिल्या. मंत्री सत्तार यांनी आदेश देताच बंदोबस्तसाठी उपस्थित असलेल्या पोलिसांनी थेट समोर बसलेल्या लोकांवर लाठी चार्ज सुरू केला. पोलिसांकडून लाठीमार होताच एकच धावपळ उडाली. दिसेल त्याला पोलीस मारत होते.
विजय वडेट्टीवार यांची टीका..
यावर आता विरोधी पक्षनेते विजय वडेट्टीवार ट्वीट करत म्हटले आहे की, “महायुती सरकारची हीच संस्कृती हीच भाषा. मंत्री अब्दुल सत्तारांचे आभार मानतो जे त्यांनी महायुती सरकारचा खरा चेहरा स्वतः जनतेसमोर आणला. हजारोंच्या गर्दी सामोर पोलिसांना लाठीचार्ज करण्याचे तोंडी आदेश देऊन लोकांना फोडून काढायची भाषा वापरतात. महाराष्ट्र पोलीस दलातील जवानांना हे महायुतीतील मंत्री स्वतःच्या टोळीतील “गुंड” समजतात का?…सांस्कृतिक, सामाजिक, प्रबोधनाच्या नावाखाली कार्यक्रम घेऊन उपस्थितांच्या आई बापांवर अश्लील भाषेत टिपणी करत हजारो माता भगिनींना मान शरमेनं खाली घालायला लावणारे हे कसले मंत्री आणि हे कोणते प्रबोधनात्मक कार्यक्रम?”, असे देखील वडेट्टीवार म्हणाले.
महायुती सरकारची हीच संस्कृती हीच भाषा !
मंत्री अब्दुल सत्तारांचे आभार मानतो जे त्यांनी महायुती सरकारचा खरा चेहरा स्वतः जनतेसमोर आणला.
हजारोंच्या गर्दी सामोर पोलिसांना लाठीचार्ज करण्याचे तोंडी आदेश देऊन लोकांना फोडून काढायची भाषा वापरतात. महाराष्ट्र पोलीस दलातील जवानांना हे… pic.twitter.com/TFIO9WOgRi
— Vijay Wadettiwar (@VijayWadettiwar) January 4, 2024
