जालना : मुख्यमंत्री माझी लाडकी बहीण योजना राज्यात नंबर वन ठरली आहे. राज्यातील जवळपास अडीच लाख महिला भगिनींनी या योजनेचा लाभ घेतला आहे. या योजनेसाठी अनेक महिलांनी तासंतास रांगा लावून अर्ज भरले. यातील बहुतांश महिलांना 5 हफ्त्यांचे एकूण 7500 रुपयेही थेट बँकेत जमा देखील झाले आहेत. दरम्यान, काही पुरुषांनी देखील लाडकी बहीण बनून या योजनेचा लाभ घेतला होता. ही बाब लक्षात आल्यानंतर प्रशासनाकडून त्यांच्यावर कारवाई करत गुन्हा दाखल करण्यात आला होता. अशातच आता जालन्यातील एका लाडक्या भावाने बहिणीच्या योजनेचा लाभ घेऊन कमावलेला 7 हजार 500 रुपये परत केले आहेत.
महाराष्ट्रातील जालन्यात हा प्रकार घडला. जालन्यातील जळगाव सोमनाथ येथील रहिवासी असलेल्या विलास भुतेकर यांच्या पत्नीकडून लाडक्या बहीण योजनेचा अर्ज भरताना नजरचुकीने विलास भुतेकर यांचं आधार कार्ड अपलोड झाले होते. दरम्यान, 5 डिसेंबर रोजी त्यांच्या खात्यामध्ये योजनेचे साडेसात हजार रुपये जमा झाले होते. मात्र, आज त्यांनी प्रशासनाशी संपर्क साधून आलेले साडेसात हजार रुपये महिला आणि बालकल्याण विभागाला परत केले आहे.
याबाबत बोलताना विलास भुतेकर म्हणाले कि, बायकोचा लाडकी बहीण योजनेचा अर्ज भरताना अनावधानाने माझा आधार क्रमांक लिहिला गेला. माझं आधार कार्ड हे बँकेला लिंक आहे. त्यामुळे माझ्या खात्यावर साडे सात हजार रुपये आले. त्यानंतर मी बँकेत चौकशी केली. पुढे आम्ही कलेक्टर ऑफिसमधील अधिकाऱ्यांशी संपर्क साधला. त्यांना लाडकी बहीणी योजनेचे पैसे परत करणार असल्याचे सांगितले. पाच डिसेंबर रोजी पैसे आले. ते आम्ही परत केले.
लाडक्या बहिणींना लागली धास्ती
दरम्यान, महायुतीला राज्यात तब्बल 237 जागांवर विजय मिळाला असून 132 जागांसह भाजप राज्यातील सर्वात मोठा पक्ष ठरला आहे. आता नव्या सरकारमध्ये मुख्यमंत्री माझी लाडकी बहीण योजनेच्या कागदपत्रांची आता तपासणी होणार असून चुकीच्या पद्धतीने कागदपत्रे जमा करत, खोटी व बनावट कागदपत्रे जमा करत ज्यांनी पैसे लाटले त्यांचे अर्ज बाद केला जाणार असल्याचे सांगण्यात येत आहे. त्यामुळे लाडक्या बहिणींना धास्ती लागली आहे.
