छत्रपती संभाजीनगर : शहरामध्ये अत्याचाराच्या घटना मोठ्या प्रमाणात घडत आहेत. महिलांच्या सुरक्षिततेवर प्रश्नचिन्ह उपस्थित झाले आहे. अशातच आता गुलंमडी परिसरातील एका मिठाईच्या दुकानासमोर आठ वर्षीय चिमुकली उभी असताना एका अनोळखी तरुणाने तिच्या जवळ येत तिच्यासोबत अश्लील कृत्य केल्याची धक्कादायक घटना घडली आहे. ही घटना १३ सप्टेंबर रोजी सायंकाळी ९ वाजण्याच्या सुमारास घडली आहे. या प्रकरणी सिटी चौक पोलिस ठाण्यात एका महिलेने फिर्याद दिली आहे.
त्यानुसार, सिटी चौक पोलिस ठाण्यात दोघांवर गुन्हा दाखल करण्यात आला असून आरोपींना अटक केली आहे. संतोष मगरे आणि सचिन साबळे (रा. जयभीमनगर, टाऊन हॉल) अशी अटक करण्यात आलेल्या आरोपींची नावे आहे.
पोलिसांनी दिलेल्या माहितीनुसार, आठ वर्षीय चिमुकली तिच्या आई-वडिलांसोबत गुलमंडी परिसरात आली होती. एका मिठाईच्या दुकानासमोर अनोळखी तरुणाने तिच्यासोबत अश्लील कृत्य केले. त्यामुळे ती चिमुकली खूप घाबरली होती. हे पाहून तिच्या वडिलांनी अश्लील कृत्य करणाऱ्या नराधमास याविषयी जाब विचारला असता त्याने मला लहान मुली आवडतात, असे उत्तर दिले. त्यावर चिमुकलीच्या वडिलाने माझ्या मुलीला हात कसा काय लावलास, असा जाब विचारला.
दरम्यान, त्यावेळी त्याठिकाणी एक दुसरा अनोळखी तरुण आला. तो म्हणाला मी दादा आहे इथला. तू मला ओळखल नाहीस का, असे बाेलून मुलीच्या वडिलास जिवे मारण्याची धमकी दिली आहे. त्यानंतर दाम्पत्याने सिटी चौक पोलिस ठाण्यात जाऊन याविषयी तक्रार नोंदवली आहे. त्यावरून दोघांविरोधात गुन्हा दाखल करण्यात आला असून, आरोपींना न्यायालयात हजर केल्यानंतर न्यायालयीन कोठडी सुनावण्यात आली आहे.पुढील तपास अधिकारी सहायक पोलिस निरीक्षक मनिषा हिवराळे करीत आहेत.
