Loni Kalbhor लोणी काळभोर, ता. 24 : लग्न समारंभाला आलेल्या एका तरुणाला अडवून तिघांनी कोयत्याने वार व डोक्यावर हल्ला करून गंभीर जखमी केल्याची धक्कादायक घटना घडली आहे. ही घटना कदमवाकवस्ती (ता. हवेली) ग्रामपंचायत हद्दीतील कवडीपाट टोलनाका परिसरातील 20 एप्रिल रोजी रात्री साडेदहा वाजण्याच्या सुमारास घडली आहे. या हल्ल्यात तरुण गंभीर जखमी झाला आहे. या थरारक हल्ल्याने नागरिकांमध्ये भीतीचे वातावरण पसरले आहे. तर लोणी काळभोर पोलीस ठाण्यात तिघांवर गुन्हा दाखल करण्यात आला आहे. Loni Kalbhor
सुरेश बाबुराव गायकवाड (वय 18), कुणाल राहुल चौगुले (वय 18) व शुभम धर्मा सोलंकी (वय माहित नाही, सर्व रा. कदमवाकवस्ती,ता. हवेली) अशी गुन्हा दाखल करण्यात आलेल्या आरोपींची नावे आहेत. या प्रकरणी आकाश सूर्यकांत पवार (वय 28, रा. वेताळबाबा वसाहत, हडपसर) यांनी लोणीकाळभोर पोलीस ठाण्यात फिर्याद दिली आहे. Loni Kalbhor
पोलिसांनी दिलेल्या माहितीनुसार, फिर्यादी आकाश हे ऑनलाईन कुरिअर सेवा देऊन आपल्या कुटुंबाचा उदरनिर्वाह करत आहेत. आकाश हे कवडीपाट टोलनाका परिसरातील एका लग्न समारंभाला गेले होते. कार्यक्रम आटोपल्यानंतर ते रात्री सुमारे 10.30 वाजता निघाले. वाटेत दत्त मंदिर येथे दर्शन घेऊन ते दुचाकीवरून घरी परतत होते. त्यांची गाडी लक्ष्मी लॉन्स परिसरात पोहोचताच त्यांच्या मागून राखाडी रंगाच्या, नंबर प्लेट नसलेल्या डिओ दुचाकीवरून तीन जण आले. त्यांनी आकाश यांची गाडी आडवी लावून थांबवले. कोणताही वाद किंवा कारण नसताना आरोपींनी शिवीगाळ सुरू केली. Loni Kalbhor
या दरम्यान मुख्य आरोपीने आकाश यांची गच्ची पकडून कोयत्याने पाठीवर वार केला. त्याच वेळी दुसऱ्या आरोपीने कमरेतील धारदार वस्तूने त्यांच्या डोक्यावर प्रहार केला. अचानक झालेल्या या हल्ल्यात आकाश यांच्या डोक्यातून मोठ्या प्रमाणात रक्तस्राव झाला. तिसऱ्या आरोपीने त्यांच्या डोळ्यांवर बुक्यांनी मारहाण केली, ज्यामुळे ते खाली कोसळले. हल्ल्यानंतरही आरोपींची दहशत थांबली नाही. त्यांनी आकाश यांच्या दुचाकीवर लाथा मारत व कोयत्याने वार करत नुकसान केले आणि घटनास्थळावरून फरार झाले. Loni Kalbhor
जखमी अवस्थेत आकाश यांनी लोणीकाळभोर पोलीस ठाण्यात धाव घेतली. पोलिसांनी त्यांना तत्काळ ससून रुग्णालयात उपचारासाठी पाठवले. प्रकृती स्थिर झाल्यानंतर त्यांनी अधिकृत तक्रार दाखल केली. या प्रकरणी तिन्ही आरोपींच्या विरोधात लोणी काळभोर पोलीस ठाण्यात शस्त्र अधिनियम 1959, महाराष्ट्र पोलीस अधिनियम 1951 तसेच भारतीय न्याय संहिता (BNS) 2023 अंतर्गत गंभीर कलमांनुसार गुन्हा दाखल करण्यात आला आहे. Loni Kalbhor
