बीड: बीड जिल्ह्यातील परळी तालुक्यातून एक गंभीर प्रकरण समोर आले आहे. धारूर तालुक्यातील सोनीमोहा येथील भरत चंद्रकांत तोंडे या अग्नीवीर जवानाविरोधात एका 24 वर्षीय तरुणीने लैंगिक शोषण, फसवणूक आणि धमकी दिल्याची तक्रार दाखल केली आहे. या प्रकरणी भरत तोंडे याच्यासह त्याच्या कुटुंबातील 7 सदस्यांविरोधात परळी ग्रामीण पोलीस ठाण्यात गुन्हा नोंदविण्यात आला आहे.
पीडित तरुणीच्या तक्रारीनुसार, आरोपीने लग्नाचे आश्वासन देत तिचा विश्वास संपादन केला. दोन्ही कुटुंबांमध्ये विवाहाबाबत चर्चा झाली होती आणि संबंधही निश्चित झाले होते. तक्रारीत म्हटले आहे की, 20 डिसेंबर 2025 रोजी आरोपीने आपल्या आई-वडिलांना भेटण्यासाठी बोलावले असल्याचे सांगून तिला दुचाकीवरून एका लॉजवर नेले. तेथे भविष्यात लग्न होणार असल्याचे सांगत तिच्याशी शारीरिक संबंध ठेवले, असा आरोप करण्यात आला आहे.
यानंतर दोन्ही कुटुंबांच्या संमतीने 6 मे 2026 रोजी विवाह करण्याचे निश्चित करण्यात आले. लग्नाच्या तयारीलाही सुरुवात झाली होती. विवाहासाठी आवश्यक साहित्य खरेदी करण्यात आले आणि निमंत्रणपत्रिकाही छापण्यात आल्या होत्या. मात्र, लग्नाची तारीख जवळ येत असताना 21 एप्रिल 2026 रोजी आरोपीने फोन करून लग्न करण्यास नकार दिल्याचा आरोप आहे.
तसेच, यापुढे संपर्क साधल्यास गंभीर परिणाम भोगावे लागतील आणि जीव घेण्याची धमकी दिल्याचाही उल्लेख तक्रारीत करण्यात आला आहे. या आधारावर पोलिसांनी लैंगिक शोषण, फसवणूक, धमकी आणि इतर संबंधित कलमांखाली गुन्हा दाखल केला आहे.
दरम्यान, गुन्हा दाखल होऊन सुमारे महिनाभराचा कालावधी उलटूनही आरोपींना अटक झालेली नसल्याचा आरोप पीडितेकडून करण्यात येत आहे. तसेच काही प्रभावशाली व्यक्तींच्या दबावामुळे तपासाची गती मंदावल्याचा दावाही करण्यात आला आहे.
न्याय मिळत नसल्याची भावना व्यक्त करत पीडित तरुणीने जिल्हाधिकाऱ्यांमार्फत राज्याच्या मुख्यमंत्र्यांकडे इच्छामरणाची परवानगी मागितली आहे. या प्रकरणाच्या तपासाकडे आणि पुढील पोलिस कारवाईकडे आता सर्वांचे लक्ष लागले आहे.
