बीड : बीडच्या परळीमधून एक धक्कादायक घटना समोर आली आहे. परळीतील बँक कॉलनीत गोळीबार झाल्याची घटना घडली आहे. यामध्ये एक ठार तर एक जण गंभीर जखमी झाल्याची प्राथमिक माहिती मिळत आहे. या घटनेने परिसरात मोठी खळबळ उडाली आहे.
मरळवाडीचे सरपंच बापू आंधळे असं गोळीबारात मृत्यू झालेल्याचे नाव आहे. तर, गंभीर जखमी झालेल्यावर परळी जिल्हा रुग्णालयात उपचार सुरु आहेत. अजित पवार गटातील धनंजय मुंडे समर्थक असल्याचे बोललं जात आहे. या प्रकरणाची माहिती मिळताच पोलिस घटनास्थळी दाखल झाले असून याप्रकरणाचा तपास सुरु आहे.
याबाबत मिळालेल्या प्राथमिक माहितीनुसार, परळीतील बँक कॉलनीत गोळीबार झाल्याची घटना घडली आहे. या घटनेत राष्ट्रवादी काँग्रेस अजित पवार गट धनंजय मुंडे समर्थक मरळवाडीचे विद्यमान सरपंच बापूराव आंधळे यांचा जागीच मृत्यू झाला आहे, तर नंदागौळ येथील ग्यानबा मारोती गित्ते जखमी झाले आहेत.
जखमी असलेल्या गीते यांच्यावर परळी येथील रुग्णालयात उपचार सुरु आहेत. दरम्यान, हा गोळीबार नेमक्या कोणत्या कारणामुळे झाला आणि कुणी केला याबाबत अद्याप कोणतीही माहिती मिळू शकली नसून या प्रकरणाचा पोलिसांकडून तपास सुरु आहे. या घटनेने बीड जिल्ह्यात हळहळ व्यक्त केली जात आहे.
