छत्रपती संभाजीनगर : छत्रपती संभाजीनगरमधून एक थरारक बातमी समोर आली आहे. भर रस्त्यात अडवून 40 वर्षीय व्यक्तीची केवळ 22 सेकंदात चाकूने हल्ला करत हत्या करण्यात आली आहे. शहरातील उस्मानपुरा परिसरात मंगळवारी पहाटे पाच वाजता ही घटना घडली आहे. या चाकू हल्ल्यात चाळीस वर्षीय व्यक्ती ठार झाला असून या घटनेचा सीसीटीव्ही व्हिडिओ समोर आला आहे. या घटनेतील आरोपीला उस्मानपुरा पोलिसांकडून अटक करण्यात आली आहे. छत्रपती संभाजीनगर शहरातील उस्मानपुरा हा अत्यंत वर्दळीचा व प्रमुख समजला जाणारा भाग आहे. या भागात झालेल्या निर्घृण हत्येनंतर शहरातील नागरिकांमध्ये भीती निर्माण झाली आहे.
नेमकं काय घडलं?
छत्रपती संभाजी नगर शहरातील उस्मानपुरा भागात सोमवारी पहाटे पाच वाजता मृत अशोक शिनगारे फिरायला जाण्यासाठी घराबाहेर पडले होते . त्यावेळी तरुणांचा एक घोळका तिथे थांबल्याचे त्यांना दिसले .तिथे काय चाललंय हे पाहायला गेल्याने त्यातील एकाने चाकूने मानेवर पाठीवर व तोंडावर वार केले . विशेष म्हणजे हा व्यक्ती खाली कोसळल्यानंतरही आरोपी त्याच्यावर वार करत राहिला. या हल्ल्या मागील कारण अद्याप समजू शकलेले नाही. तरी दारू पिण्याच्या वादातून हा खून झाल्याचा संशय व्यक्त करण्यात येत आहे.
आरोपी अटकेत..
चाकूने हल्ला करत पळ काढलेल्या आरोपीला उस्मानपुरा पोलिसांनी सीसीटीव्ही कॅमेऱ्याच्या आधाराने पकडत तातडीने अटक केली असल्याची माहिती मिळत आहे. निखिल शिंगाडे असे हत्या करणाऱ्या आरोपीचे नाव आहे . अवघ्या 22 सेकंदात चाकूने भोसकत खून केल्याने थरकाप उडाला आहे . हा सर्व प्रकार सीसीटीव्हीमध्ये कैद झाला आहे.
