जालना : राज्यात सध्या मराठा आरक्षणाचा मुद्दा चांगलाच पेटला आहे. मराठा आरक्षणाच्या मागणीसाठी मराठा बांधव चांगलेच आक्रमक झाले आहेत. मराठा आरक्षणाचा फटका राजकीय नेत्यांचा दौऱ्यांना बसत आहे. आज राज्याचे उपमुख्यमंत्री जालना दौऱ्यावर आहेत. यावेळी देवेंद्र फडणवीस यांच्या गाड्यांचा ताफा अडवण्याचा प्रयत्न मराठा बांधवांनी केला. यावेळी उपमुख्यमंत्र्यांविरोधात जोरदार घोषणाबाजीही करण्यात आली. फडणवीस गो बॅक अशा घोषणा देत निषेद करण्यात आला.
उपमुख्यमंत्री देवेंद्र फडणवीस हे ‘वंदे भारत एक्सप्रेस’च्या उद्घाटनासाठी जालना जिल्ह्याच्या दौऱ्यावर आले होते. यावेळी मराठा आरक्षणाच्या मागणीसाठी बदलापूर शहरात मराठा आंदोलकांनी जोरदार घोषणाबाजी करत देवेंद्र फडणवीस यांचा ताफा अडवण्याचा प्रयत्न केला.
आंदोलकांनी देवेंद्र फडणवीस यांचा ताफा दिसताच त्याला काळे झेंडे दाखवले. तसेच ‘देवेंद्र फडणवीस गो बॅक’च्या घोषणा देत निषेध व्यक्त करण्यात आला. पोलिसांनी तात्काळ हस्तक्षेप करत कार्यकर्त्यांना अडवले. याप्रकरणी पोलिसांनी चार कार्यकर्त्यांना ताब्यात घेतल्याची प्राथमिक माहिती आहे.
