Crime News: बीड : जिल्ह्यातील युसूफवडगाव पोलीस ठाण्याच्या हद्दीत एक धक्कादायक प्रकार समोर आला आहे. एका तरुणीने तिच्या प्रियकराला भेटण्यासाठी गेल्याची माहिती नातेवाइकांना मिळाल्यानंतर त्यांनी तिचा पाठलाग केला. या घटनेत प्रियकर पळून जाण्यात यशस्वी झाला, मात्र संतापलेल्या नातेवाइकांनी तरुणीवरच राग काढत मारहाण केल्याचे समोर आले आहे.
मिळालेल्या माहितीनुसार, तालुक्यातील एका गावातील तरुणीला भेटण्यासाठी शेजारच्या लाडेवडगाव येथील तरुण आला होता. दोघे भेटणार असल्याची माहिती नातेवाइकांना मिळाल्यानंतर त्यांनी त्या तरुणाचा पाठलाग सुरू केला. परिस्थितीची जाणीव होताच संबंधित तरुण घटनास्थळावरून पळून गेला.
प्रियकर हातातून निसटल्याने नातेवाइकांनी नंतर संबंधित तरुणीला गाठले. ते तिच्या मागावर राहून शेजारच्या गावात गेले. त्या ठिकाणी त्यांनी तरुणीसह तिच्या मैत्रिणीलाही पकडले आणि दोघींनाही मारहाण केली. या घटनेमुळे परिसरात काही काळ तणावाचे वातावरण निर्माण झाले होते.
दरम्यान, या प्रकाराची माहिती एका नागरिकाने तातडीने पोलिसांना दिली. “दोन मुलींना काही लोक मारहाण करत आहेत,” अशी माहिती मिळताच युसूफवडगाव पोलीस घटनास्थळी दाखल झाले. त्यांनी परिस्थिती नियंत्रणात आणली आणि दोघींना सुरक्षित केले.
पोलिसांच्या प्राथमिक तपासात हे प्रकरण घरगुती वादाशी संबंधित असल्याचे स्पष्ट झाले आहे. मात्र संबंधित कुटुंबाने कोणतीही अधिकृत तक्रार देण्यास नकार दिल्याने पोलिसांना पुढील कारवाई करता आली नाही. त्यामुळे या प्रकरणी गुन्हा नोंदवला गेला नाही.
या घटनेमुळे परिसरात काही काळ भीती आणि तणावाचे वातावरण निर्माण झाले होते.
