पिंपरी-चिंचवड: पिंपरी-चिंचवडमधील दापोडी परिसरात मुळा नदीच्या पात्रात एका अज्ञात महिलेचा मृतदेह आढळून आल्याने आज दुपारपासून परिसरात खळबळ उडाली. दुपारी सुमारे 12:30 वाजण्याच्या सुमारास काही नागरिकांच्या निदर्शनास नदीत मृतदेह तरंगताना आल्याने त्यांनी तातडीने प्रशासनाला माहिती दिली.
माहिती मिळताच पिंपरी-चिंचवड महानगरपालिकेच्या अग्निशमन दलाने घटनास्थळी धाव घेतली. ‘जलपरी’ या विशेष रेस्क्यू वाहनाच्या मदतीने जवानांनी नदीपात्रात उतरून शोधमोहीम राबवली आणि अथक प्रयत्नांनंतर संबंधित महिलेचा मृतदेह बाहेर काढण्यात यश मिळवले.
घटनास्थळी पोलिसांनी पंचनामा करून मृतदेह ताब्यात घेतला असून उत्तरीय तपासणीसाठी पाठवण्यात आला आहे. मात्र या महिलेचा मृत्यू नेमका कशामुळे झाला, हा प्रश्न अद्याप अनुत्तरित आहे. आत्महत्येचा प्रकार आहे की इतर कोणता गुन्हेगारी अँगल आहे, याचा शोध पोलिसांकडून घेतला जात आहे.
सदर महिलेची ओळख अद्याप पटलेली नाही. त्यामुळे दापोडी पोलिसांकडून परिसरातील आणि आसपासच्या पोलीस ठाण्यांमधील बेपत्ता व्यक्तींच्या तक्रारींची पडताळणी सुरू करण्यात आली आहे. तसेच, नदीकाठच्या भागातील सीसीटीव्ही फुटेज तपासण्याची शक्यता वर्तवली जात आहे.
अशा घटनांमुळे शहरात सुरक्षिततेबाबत चिंता व्यक्त केली जात असून, विशेषतः नदीकाठच्या भागात देखरेख वाढवण्याची गरज अधोरेखित होत आहे. दरम्यान, महिलेची ओळख पटल्यास या प्रकरणातील नेमके कारण समोर येण्याची शक्यता असून, पोलिसांचा तपास त्यादृष्टीने सुरू आहे.
