Crime News: छत्रपती संभाजीनगर : छत्रपती संभाजीनगर शहरातील नारेगाव परिसरात बेकायदेशीर गर्भलिंगनिदान आणि गर्भपाताचे रॅकेट उघडकीस आले आहे. या प्रकरणामुळे परिसरात मोठी खळबळ उडाली असून या रॅकेटची पाळेमुळे खोलवर असल्याचे तपासात समोर येत आहे. एमआयडीसी सिडको पोलिसांनी कारवाई करत या प्रकरणातील दोन संशयितांना अटक केली आहे.
पोलिसांना मिळालेल्या माहितीनुसार, या रॅकेटमध्ये लिंगनिदानासाठी सुमारे 14 हजार रुपये घेतले जात होते. या प्रकरणाचा तपास करताना पोलिसांनी एका महिला कर्मचाऱ्याला डमी रुग्ण बनवून सापळा रचला. ठरलेल्या ठिकाणी आरोपी आले असता त्यांना रंगेहात पकडण्यात आले. अटकेत राहुल माणिकराव झोंड आणि सोमनाथ परसराम बारसे यांचा समावेश आहे. न्यायालयाने दोघांना 27 मार्चपर्यंत पोलीस कोठडी सुनावली आहे.
तपासादरम्यान एक धक्कादायक बाब समोर आली असून, आरोपींपैकी एकाने यूट्यूबच्या माध्यमातून लिंगनिदानाचे प्रशिक्षण घेतल्याचे स्पष्ट झाले आहे. आरोपींकडून विदेशी बनावटीचा पोर्टेबल सोनोग्राफी उपकरण आणि टॅब जप्त करण्यात आले आहे. या रॅकेटचा मुख्य सूत्रधार डॉ. सतीश सोनवणे आणि संबंधित महिलेचा पती सपकाळ हे अद्याप फरार असून पोलिसांकडून त्यांचा शोध सुरू आहे.
याआधी 7 मार्च रोजी मराठवाडा भागात अशाच प्रकारच्या रॅकेटचा उलगडा झाला होता. नारेगाव परिसरात एका 26 वर्षीय विवाहित महिलेवर बेकायदेशीरपणे लिंगनिदान करून गर्भपात केल्याचा प्रकार समोर आला होता. या प्रकरणानंतर पोलिसांनी सापळा रचून संपूर्ण जाळे उघड केले.
या प्रकरणामुळे बेकायदेशीर गर्भलिंगनिदान आणि गर्भपाताविरोधात पुन्हा एकदा प्रश्न निर्माण झाला असून पोलिसांचा तपास सुरू आहे.
