Chhagan Bhujbal : नांदेड : ओबीसी नेते छगन भुजबळ यांचा दुसरा मेळावा होत आहे. मराठवाड्यातल्या हिंगोली येथे ओबीसींचा मेळावा पार पडत आहे. मेळाव्यासाठी मंत्री छगन भुजबळ हे नांदेडमध्ये विमानाने दाखल झाले. तिथून ते कारने हिंगोलीकडे रवाना झाले आहेत.
त्याआधी नांदेड येथील अर्धापूरजवळील पिंपळगाव पाटीजवळ भुजबळांचा ताफा अडवण्याचा प्रयत्न केला आणि काळे झेंडे दाखवले. ताफा अडवल्याप्रकरणी आणि काळे झेंडे दाखवल्यामुळे पोलिसांनी तीन कार्यकर्त्यांना अटक केल्याची माहिती मिळत आहे. पोलिसांनी वाट मोकळी करुन दिल्याने भुजबळ हिंगोलीकडे रवाना झाले.भुजबळांच्या सभेच्या पार्श्वभूमीवर रविवारी सकाळीच स्वराज्य संघटनेने भुजबळांची सभा उधळून लावण्याचा इशारा दिला. त्यामुळे हिंगोली येथे सभास्थळी आणि नांदेड विमानतळावर चोख पोलीस बंदोबस्त ठेवण्यात आला होता. जालन्याच्या अंबडमध्ये पहिल्या सभेत भुजबळांनी आक्रमक भाषण केल्याने त्यांचा निषेध केला जात आहे.
मराठा आरक्षणाचा लढा एकीकडे सुरु असताना छगन भुजबळ यांनी मराठ्यांना ओबीसी प्रवर्गातून आरक्षण देण्यास विरोध केला आहे. त्यातच मनोज जरांगे पाटील आणि छगन भुजबळ यांच्यात आरक्षणावरून तू-तू..मैं-मैं.. होत आहे. त्यामुळे वातावरण तणावपूर्ण झालेलं आहे. छगन भुजबळ यांची गाडी अडवण्याचा प्रयत्न झाल्यानंतर ओबीसी नेते प्रकाश शेंडगे आणि बबनराव तायवाडे यांनी प्रतिक्रिया दिली आहे. ”आमची सभा घेण्यासाठी कुणीही रोखू शकत नाही. ओबीसी समाज जशास तसं उत्तर देईल आणि भुजबळांची सभा होईल. मनोज जरांगेंनी आंदोलकांना आवरावं” असं आवाहन त्यांनी केलं.
