गेवराई : बीडच्या गेवराई तालुक्यातील चकलंबा गावच्या शिवारात वीज कोसळून 3 महिला ठार झाल्या आहेत. तर एक महिला जखमी झाल्याची घटना घडली आहे. जखमी महिलेवर जिल्हा रुग्णालयात उपचार सुरु आहेत. ही घटना आज (दि.२६) सायंकाळच्या सुमारास घडली आहे.
विजया राधाकिसन खेडकर (वय-45), शालन शेशेराव नजन (वय-55), लंकाबाई हरिभाऊ नजन (वय-42) अशी मृत्यू झालेल्या महिलांची नावे आहेत. तर यमुनाबाई माणिक खेडकर या जखमी झाल्या आहेत. चकलांबा शिवारात काही महिला खुरपणीचे काम करत होत्या, यावेळी त्यांच्यावर काळाने घाला घातला.
याबाबत मिळालेल्या माहितीनुसार, चकलांबा शिवारात काही महिला शेतात खुरपणचे काम करत होत्या. सायंकाळ झाली होती. हातातील काम आटोपून महिला घरी जाणार होत्या. यावेळी अचानक पावसाला सुरुवात झाली. पावसापासून बचाव करण्यासाठी सुरक्षितस्थळी जाण्यापूर्वीच अंगावर वीज कोसळली. या घटनेत 3 महिला जागीच ठार झाल्या, तर एक महिला गंभीर जखमी झाली. जखमी महिलेवर बीडच्या जिल्हा रुग्णालयात उपचार सुरू आहेत. या घटनेमुळे परिसरात हळहळ व्यक्त केली जात आहे
