पुणे : अँटिलिया आणि मनसुख हिरेन हत्या प्रकरणी अटकेत असलेले माजी पोलीस अधिकारी सचिन वाझे यांना मोठा दिलासा मिळाला आहे. मुंबईतील सत्र न्यायालयाने दीर्घ कारावासाच्या आधारावर त्यांना जामीन मंजूर केला होता. या जामिनाविरोधात राष्ट्रीय तपास यंत्रणेने उच्च न्यायालयात धाव घेतली होती. मात्र, उच्च न्यायालयाने NIA ची याचिका फेटाळत जामीन रद्द करण्यास तसेच यावर पुन्हा सुनावणी घेण्यास स्पष्ट नकार दिला. त्यामुळे वाझे यांच्या तुरुंगातून बाहेर येण्याचा मार्ग पूर्णपणे मोकळा झाला आहे.
या प्रकरणात उच्च न्यायालयात काही महत्त्वाच्या घडामोडी पाहायला मिळाल्या. सुरुवातीला न्यायमूर्ती सारंग कोतवाल यांनी या याचिकेवर सुनावणी करण्यास असमर्थता दर्शवली. त्यानंतर न्यायमूर्ती भारती डांगरे यांच्या खंडपीठासमोर हे प्रकरण आले असता, हे प्रकरण आपल्या अधिकारात येत नसल्याचे सांगत त्यांनीही सुनावणी घेण्यास नकार दिला. त्यामुळे सचिन वाझेंना दिलासा मिळाला आहे.
न्यायमूर्ती भारती डांगरे यांच्यासोबत पीठासीन असलेले न्यायमूर्ती आशिष चव्हाण हे माजी गृहमंत्री अनिल देशमुख यांच्या सीबीआय प्रकरणात पूर्वी वकील म्हणून काम पाहत होते. त्यामुळे उच्च न्यायालयात दोनदा सुनावणीस नकार मिळाल्यानंतर NIA कडून मुख्य न्यायमूर्तींकडे दाद मागण्याचे प्रयत्न सुरू होते.
जवळपास 2000 दिवस तुरुंगात घालवल्यानंतर सचिन वाझे यांची सुटका होत असली, तरी न्यायालयाकडून त्यांच्यावर काही कडक अटी लादण्यात आल्या आहेत. त्यानुसार त्यांना मुंबई, नवी मुंबई, ठाणे, रायगड आणि पालघर या 5 जिल्ह्यांमध्ये प्रवेश करण्यास पूर्ण बंदी घालण्यात आली आहे. केवळ न्यायालयातील सुनावणीच्या तारखेपुरतेच त्यांना या जिल्ह्यांमध्ये येण्याची परवानगी असेल आणि सुनावणी संपताच तत्काळ बाहेर जावे लागेल. या अटींमुळे सुटकेनंतर सचिन वाझे यांचा नवीन मुक्काम आता पुणे येथे असणार आहे.
