पालघर : भाजीपाला गाडीच्या आड गांजाची तस्करी करण्याचा धक्कादायक प्रकार समोर आला आहे. जव्हार पोलिसांनी गांजाची तस्करी करणाऱ्यावर करावी केली आहे. या कारवाईत गांजा आणि महिंद्रा पिकअप गाडीसह सुमारे साडेअकरा लाखांचा मुद्देमाल जप्त करण्यात आला आहे. ही कारवाई डहाणू जव्हार रोडवरील डहाणू नाका येथे करण्यात आली. या कारवाईमुळे गांजा तस्करांचे धाबे चांगलेच दणाणले आहेत.
पोलिसांनी दिलेल्या माहितीनुसार, भाजीपाला वाहतूक करणाऱ्या पिकअप गाडीमध्ये गांजाची तस्करी सुरु असल्याची गुप्त माहिती जव्हार पोलिसांना मिळाली. त्या मिळालेल्या माहितीच्या आधारे पोलिसांनी डहाणू जव्हार रोडवरील डहाणू नाका येथे सापळा रचला. डहाणू नाका येथे जव्हार पोलिसांनी भाजीपाल्याच्या गाडीच्या आड गांजाची तस्करी करणाऱ्यां तीन जणांना ताब्यात घेऊन वाहनाची झडती घेतली असता वाहनामध्ये जवळपास ८ लाखाचा गांजा आढळला.
या कारवाईत पोलिसांनी गांजा आणि महिंद्रा पिकअपसह सुमारे साडेअकरा लाखांचा मुद्देमाल जप्त करण्यात आला आहे. या प्रकरणी जव्हार पोलीस ठाण्यात गुन्हा दाखल करण्यात आला असून पुढील तपास पोलीस करत आहेत.
