रोहा : रोहा पोलीस ठाण्याच्या स्टेशन हद्दीतील कारिवणे येथे जंगल भागात गावठी दारूची भट्टी असल्याची माहिती रोहा पोलिसांना मिळाली होती. या माहितीच्या आधारे रोहा पोलीस ठाण्याचे पो. नि. देवीदास मुपडे यांच्या मार्गदर्शनाखाली पोलिसांनी या ठिकाणी धाड टाकत कारिवणे जंगल भागाची पाहणी केली. यादरम्यान त्यांना येथे बेवारस स्थितीत दारू तयार करण्यासाठी लागणारा माल व साहित्य तसेच गावठी दारू, गुळ व नवसागर मिश्रित रसायनांच्या २०० लिटरच्या चार टाक्या अशा एकूण ८०० लिटर रसायन आढळले. त्यावर पोलिसांनी येथे आढळलेला दारू साठा व इतर साहित्य असा एकूण ३५ हजार रुपये किमतीचा ऐवज या ठिकाणी नष्ट केला.
