रायगड: गुजरातचा महाराष्ट्रावर डोळा आहे. जाती जातीत भांडण लावली जात आहेत. मराठी माणूस एकत्र राहू नयेत यासाठी बाहेरचे प्रयत्न करत आहेत. आज ज्या प्रकारचे राजकारण सुरु आहे ते पाहता, महाराष्ट्राचे तुकडे पडायला वेळ लागणार नाही, नागरिकांनी सतर्क राहिले पाहिजे, असा इशारा मनसे प्रमुख राज ठाकरेंनी दिला आहे.
राज ठाकरेंच्या हस्ते आज मनसे सहकार शिबिराचं उद्घाटन रायगड येथे झाले. यावेळी त्यांनी त्यांच्या भाषणातून भाजप, नरेंद्र मोदी यांच्यावर जोरदार टीका केली. गुजरातचा महाराष्ट्रावर डोळा आहे. जाती जातीत भांडण लावली जात आहेत. मराठी माणूस एकत्र राहू नयेत यासाठी बाहेरचे प्रयत्न करत आहेत, अशा शब्दात त्यांनी भाजपवर निशाणा साधला.
विविध विषयांवर राज ठाकरेंनी आपली मते मांडली. यात मराठवाड्याच दुष्काळ, कोकण किनारपट्टी, ऊस लागवड याशिवाय अन्य विषयांवर त्यांनी भाश्य केलं. राज ठाकरे भाषणात म्हणाले, आपली महानंदा डेअरी अमूल गिळंकृत करते का असा प्रश्न उभा आहे. मराठवाड्यात विहिरीला 800-900 फूट पाणी नाही. साखर कारखान्यांनी पाणी खेचल्यास मराठवाड्याचे वाळवंट झाल्याशिवाय राहणार असे तज्ञ सांगत आहेत पण साखर कारखाना मालकांना फरक पडत नाही. जमीनीच वाळवंट झाल्यास ती पूर्ववत करायला 400 वर्ष लागतील.
राज ठाकरे म्हणाले, आपले नेते पैशाने वेडे झाले आहेत. त्यांना कळत नाही. कुठून कुठे जातात. पालघर , ठाणे , रायगड हातातून जात आहे, कोकण किनारपट्टीला मोठा धोका आहे. महाराजांनी सांगितले होते, आपला शत्रू समुद्रामार्गे येईल, समुद्रावर गस्त वाढवा. आपल्याकडे शत्रू समुद्रामार्गे आले.
राज ठाकरे म्हणाले, इतर समाजातील लोक म्हणतात मराठी माणसाला धंदा जमत नाही, पण असंख्य मराठी माणसे करोडोंचे व्यवसाय करतात पण गप्प असतात. शोबाजी करत नाही. जगातील प्रसिद्ध परफ्यूमचा अर्क हे ठाण्यातील केळकर बनवतात. आपली ताकद खूप मोठी आहे. राज्यात सहकार चळवळ उभी राहिली आहे. आताचे सरकार ही सहकार चळवळ नाही ती सहारा चळवळ आहे. महात्मा जोतीबा फुले यांनी सहकार चळवळ उभी केली. जमिनी श्रीमंताच्या घशात जावू नयेत म्हणून जोतीबांनी पहिले आंदोलन केले.
