अलिबाग: श्रीवर्धन येथील रामदास गोविंद खैरे या वयोवृद्ध इसमाच्या हत्येची उकल करण्यात रायगड पोलिसांच्या स्थानिक गुन्हे अन्वेषण विभागाला यश आले आहे. संपत्तीच्या लालसेतून रामदास खैरे यांची हत्या झाल्याचे उघड झाले आहे. या प्रकरणी पोलिसांनी ठाणे आणि चेंबूर येथून हत्या करणाऱ्या दाम्पत्याला अटक केली आहे. सेवानिवृत्त बँक कर्मचारी रामदास खैरे हे श्रीवर्धन आराठी येथील कुंदन रेसिडेन्सी येथे एकटेच राहत होते. त्यांचा फोन बंद असून संपर्क होत नसल्याची तक्रार श्रीवर्धन पोलिसांना प्राप्त झाली होती. त्यानुसार पो. नि. रिकामे यांनी त्यांच्या घरी जाऊन पाहणी केली असता रामदास खैरे यांची हत्या करण्यात आल्याचे समोर आले. या घटनेची माहिती मिळताच श्रीवर्धनच्या उपविभागीय पोलीस अधिकारी सविता गर्जे यांनी घटना स्थळाला भेट देऊन पाहणी केली. यानंतर श्रीवर्धन पोलीस ठाण्यात अज्ञातांविरोधात गुन्हा नोंद करण्यात आला.
गुन्ह्याचे गंभीर स्वरूप लक्षात घेऊन अप्पर पोलीस अधीक्षक अभिजीत शिवथरे यांनी स्थानिक गुन्हे शाखेला या गुन्ह्याचा समांतर तपास करण्याचे आदेश दिले. त्यावर पो.नि. बाळासाहेब खाडे यांनी दोन पथके तयार करून तपासाला सुरुवात केली. तांत्रिक पुराव्यांच्या मदतीने या प्रकरणात दोन संशयित आरोपी असल्याचे निष्पन्न झाले. त्यानंतर पोलिसांनी कळवा-ठाणे येथून या महिलेला आणि चेंबूर येथून तिच्या पतीला ताब्यात घेतले.
या दोघांची पोलिसांनी कसून चौकशी केली असता त्यांनी संपत्तीच्या लालसेतून ही हत्या केल्याचे समोर आले आहे. रामदास खैरे यांच्या पत्नीचे निधन झाल्याने ते एकटेच राहत होते. त्यानंतर त्यांनी लग्न करण्याचे ठरवले होते, याची माहिती मिळताच संबंधित महिलेने रामदास यांच्याशी संपर्क साधून त्यांचा विश्वास संपादन केला. त्यानंतर काही दिवस त्यांच्यासोबत श्रीवर्धन येथे येऊन राहिली.
दरम्यान, तिने लग्नाचे आमिष दाखवून रामदास खैरे यांचे दागिने आणि पैसे लुटून पसार झाली होती. त्यानंतर तिने दुसऱ्या व्यक्तीसोबत लग्न केले. याची माहिती मिळाल्यावर रामदास खैरे यांनी तिच्यामागे पैसे आणि दागिने परत आणून देण्याचा तगादा लावला होता. त्यावर तिने रामदास यांची हत्या करण्याचा कट रचला. यासाठी तिने तिच्या पतीची मदत घेतली. सुरुवातीला त्यांनी रामदास यांच्या जेवणात कीटकनाशक टाकून त्यांना झोपवले. नंतर दोघांनी मिळून त्यांची हत्या करून घरातील मौल्यवान वस्तू घेऊन पसार झाले. मात्र पोलिसांनी तपास कौशल्याच्या जोरावर दोघांना बेड्या ठोकून त्यांना श्रीवर्धन पोलिसांच्या ताब्यात दिले.
