रायगड: रायगड जिल्हा पोलिस दलात एका पत्रामुळे (Raigad News) खळबळ उडाली आहे. महाड शहर पोलिस ठाण्याचे पोलिस निरीक्षक रमेश तडवी (Mahad News) यांनी थेट पोलिस महासंचालकांना पत्र लिहून सततच्या जातीवाचक अपमान आणि मानसिक छळामुळे कुटुंबासह आयुष्य संपवण्याचा (Raigad Police) इशारा दिला आहे. या पत्रात दोन पोलिस अधीक्षक, एक अपर पोलिस अधीक्षक आणि इतर वरिष्ठ अधिकाऱ्यांची नावे नमूद करत “माझ्या कुटुंबाच्या आत्महत्येला हेच जबाबदार असतील” असा गंभीर उल्लेख करण्यात आला आहे. (Latest Marathi News)
रमेश तडवी यांची 17 जानेवारी 2024 रोजी ठाणे ग्रामीण येथून रायगड येथे बदली झाली. 31 जानेवारी 2024 रोजी त्यांची महाड शहर पोलिस ठाण्याचे प्रभारी अधिकारी म्हणून नियुक्ती झाली. मात्र काही दिवसांतच त्यांच्या विरोधात ‘कसुरी अहवाल’ सादर झाल्याने त्यांची बदली नियंत्रण कक्षात करण्यात आली. त्यांनी या निर्णयाविरोधात मॅट न्यायालयात धाव घेतली. मॅटने बदलीला स्थगिती देत त्यांना पुन्हा महाड येथे नियुक्त करण्याचे आदेश दिले. उच्च न्यायालयानेही हा आदेश कायम ठेवला आणि 10 सप्टेंबर 2025 रोजी ते पुन्हा रुजू झाले.
तडवी यांनी पत्रात आरोप केला आहे की, आदिवासी भिल्ल समाजातील असल्यामुळे त्यांना “खालच्या जातीचा” म्हणून हिणवले गेले. “तू इथे कसा राहतो ते बघतो, तुझी बदली करणारच,” अशा शब्दांत धमक्या दिल्याचा दावा त्यांनी केला आहे. काही वरिष्ठ अधिकारी सार्वजनिक ठिकाणी जातीचा उल्लेख करून अपमान करत असल्याचेही त्यांनी नमूद केले आहे.
महाड नगरपालिका निवडणुकीदरम्यान दाखल झालेल्या एका गुन्ह्यात बेकायदेशीर अटक करण्यासाठी दबाव टाकण्यात आल्याचा आरोपही त्यांनी केला आहे. त्यास नकार दिल्यानंतर छळ वाढल्याचे त्यांनी म्हटले आहे.
या गंभीर आरोपांमुळे पोलिस दलातील अंतर्गत वातावरण, जातीय भेदभावाचे प्रश्न आणि वरिष्ठ अधिकाऱ्यांच्या भूमिकेवर प्रश्नचिन्ह निर्माण झाले आहे. संबंधित अधिकाऱ्यांकडून अद्याप अधिकृत प्रतिक्रिया आलेली नाही. या प्रकरणाची निष्पक्ष चौकशी होणे आवश्यक असल्याची मागणी होत आहे.
