दिवाः मध्य रेल्वेच्या कोपर आणि दिवा स्थानकांदरम्यान सोमवारी सकाळी लोकलमधून प्रवासी पडून जखमी झाला आहे. रुपेश पांडुरंग पेंडारकर असे या प्रवाशाचे नाव आहे. त्यांच्या डोक्याला गंभीर दुखापत झाली असून त्यांना जवळच्या रुग्णालयात दाखल करण्यात आले आहे. सकाळी गर्दीच्या वेळी बदलापूर- ठाणे या धिम्या लोकलमध्ये हा अपघात झाला. पेंडारकर भरलेल्या ट्रेनच्या दाराजवळ उभे असताना त्यांचा तोल गेल्याने ते रुळांवर पडले. ते पडल्याचे मोटरमनला कळताच तत्काळ मदत मिळावी म्हणून ट्रेन काही वेळ थांबवण्यात आली.
