मुंबई: देशात कोरोनाच्या नव्या व्हेरिंएटने पुन्हा एकदा डोकं वर काढलं आहे. भारतात नव्या रुग्णांची संख्या वाढत असताना राज्यात ओमायक्रॉनच्या जेएन1 सब-व्हेरिएंटने शिरकाव केला आहे. सिंधुदुर्गातील 41 वर्षीय पुरुषालान1 सब-व्हेरिएंटची लागण झाल्याची माहिती राज्याच्या आरोग्य विभागाने दिली आहे.
या नव्या व्हेरिएंटच्या शिरकावानंतर जिल्हास्तरावर खबरदारी घेण्याच्या सूचना आरोग्य विभागाने दिल्या आहेत. इंफ्लून्झा आणि सारीचे सर्व्हेक्षण अधिक सक्षम करण्याच्या सूचनाही दिल्या आहेत. सोबतच, कोव्हिड चाचण्या वाढवण्यासंदर्भात देखील आदेश दिल्याची माहिती आरोग्य विभागाने दिली आहे.
मागील काही दिवसांत राज्यात पुन्हा एकदा कोरोना रुग्णांची संख्या वाढत असल्याचं समोर येत आहे. रुग्णांची संख्या जरी मोठी नसली तरी नव्या व्हेरीयंटचा अनेकांनी धसका घेतल्याचं पाहायला मिळत आहे. केरळमध्ये पुन्हा एकदा कोरोना रुग्णांच्या संख्येत वाढ होते आहे. त्याचप्रमाणे महाराष्ट्रात सध्या 45 सक्रिय रुग्ण आहेत. त्यातच बुधवारी एकूण 14 रुग्णांचे निदान झाले आहे. याचं प्रमुख कारण म्हणजे जेएन1 हा नव्याने आलेला व्हेरीयंट असल्याचं बोललं जात आहे. यासंबंधी केंद्राकडून राज्यातील आरोग्य मंत्र्यांची बैठक घेण्यात आली असून घाबरण्याचं कारण नसलं तरी सतर्क राहण्याच्या सूचना देण्यात आल्या आहेत.
