सिंधुदुर्ग : कुडाळ तालुक्यातील वर्दे परिसरात 23 वर्षीय महाविद्यालयीन विद्यार्थिनी दामिनी किरण पालव हिच्या हत्या प्रकरणाने जिल्ह्यात खळबळ उडाली आहे. या प्रकरणातील संशयित साहिल विश्राम धुरी (वय 22) याला स्थानिक गुन्हे अन्वेषण शाखेच्या पथकाने शनिवारी रात्री सुमारे 11:30 वाजता वेंगुर्ले तालुक्यातील मठ येथील त्याच्या घरातून ताब्यात घेतले. प्राथमिक तपासानुसार, एकतर्फी प्रेमातून हा गुन्हा घडल्याचा संशय पोलिसांनी व्यक्त केला आहे.
दामिनी पालव कुडाळ तालुक्यातील महाविद्यालयात हॉटेल मॅनेजमेंटचे शिक्षण घेत होती. शनिवारी सकाळी ती नेहमीप्रमाणे कॉलेजला गेली होती. सायंकाळी एसटी बसने कडावल येथे उतरून ती वर्दे येथील आपल्या घरी पायी जात होती. त्याचदरम्यान कडावल-वर्दे रस्त्याजवळील ‘सायल्याचा व्हाळ’ परिसरात तिच्यावर धारदार शस्त्राने हल्ला करण्यात आला. या हल्ल्यात तिचा मृत्यू झाला. प्राथमिक तपासात तिच्यावर चाकूने 17 ते 18 वार करण्यात आल्याची माहिती समोर आली आहे.
पोलिसांनी दिलेल्या माहितीनुसार, दामिनी आणि साहिल यांची ओळख इन्स्टाग्रामवर झाली होती. दोघांमध्ये गेल्या 2 वर्षांपासून संपर्क असल्याचे तपासात समोर आले आहे. साहिलने दामिनीसमोर प्रेमाचा प्रस्ताव ठेवला होता; मात्र तिने नकार दिल्याने तो नाराज होता, असा प्राथमिक अंदाज आहे. या प्रकरणातील नेमके कारण शोधण्यासाठी तपास सुरू आहे.
घटनेनंतर पोलिसांनी परिसरातील सीसीटीव्ही फुटेज आणि तांत्रिक माहितीच्या आधारे तपास केला. प्रत्यक्षदर्शीने दिलेल्या वर्णनाच्या आधारे संशयिताची मोटारसायकल शोधण्यात आली. त्यानंतर पोलिसांनी मठ येथे पोहोचून साहिलला ताब्यात घेतले. त्याच्या हातालाही जखम झाल्याची माहिती आहे.
पोलिसांनी दामिनी आणि संशयिताचे मोबाईल फोन जप्त केल्याचे समजते. गुन्ह्यात वापरलेले शस्त्र, हल्ल्याचे कारण आणि अन्य कोणी सहभागी होते का, याचा तपास सुरू आहे. न्यायालयाने साहिल धुरी याला 24 ऑक्टोबरपर्यंत पोलीस कोठडी सुनावली आहे. प्रकरणाचा पुढील तपास कुडाळ पोलीस करत आहेत. दरम्यान, हल्ला करण्यामागील नेमके कारण काय, याचा तपास पोलीस करत आहेत.
