बुलढाणा : बुलढाण्यात बसचा आणि विटा वाहतूक करणाऱ्या ट्रकचा भीषण अपघात झाला आहे. खामगाव ते नांदुरा महामार्गावर आमसरी फाटा येथे आज सकाळी हा अपघात झाला असून अपघातात 4 जणांचा मृत्यू झाला आहे. तर 20 जण गंभीर जखमी झाले आहेत. अपघात इतका भीषण होता की, ट्रक आणि बसच्या पुढच्या भागाचा चुरा झाला आहे.
याबाबत अधिक माहिती अशी की, अपघातग्रस्त बस ही मध्यप्रदेश परिवहन महामंडळाची आहे. बस आणि विटा वाहतूक करणाऱ्या वाहनाची समोरासमोर जोरदार धडक झाली. या अपघातात 4 जणांचा मृत्यू झाला असून 20 हून अधिक जण गंभीर जखमी झाले.दरम्यान स्थानिकांनी मदतीसाठी धाव घेत पोलिसांना पाचारण केले. नागरिकांनी जखमींना तात्काळ जवळच्या रूग्णालयात उपचारासाठी पाठवले. प्रत्यक्षदर्शींच्या माहितीनुसार, बस आणि विटा वाहतूक करणारे ही दोन्ही वाहने प्रचंड वेगात होती. धडक इतकी जोरदार होती की बस आणि वाहनाचा पुढील भाग पूर्णपणे चक्काचूर झाला. अपघातानंतर रस्त्यावर काचांचा खच पडला. रस्त्यावर विटा पसरल्या होत्या. जखमी प्रवाशांचा आक्रोश आणि गोंधळामुळे परिसरात तणावाचे वातावरण झाले. या अपघाताची माहिती मिळताच खामगाव पोलीस घटनास्थळी दाखल झाले.
दरम्यान काही जखमींची प्रकृती चिंताजनक असून पोलिसांनी घटनास्थळाचा पंचनामा करून तपास सुरू केला आहे. पोलिसांकडून मृताची ओळख पटवण्याचे काम सुरू आहे.
