गडचिरोली : गडचिरोलीमध्ये पोलीस व नक्षलवाद्यांमध्ये झालेल्या चकमकीत चार नक्षल्यांचा खातमा करण्यात आला आहे. गडचिरोली पोलिसांचे हे मोठे यश असल्याचे मानण्यात येत आहे. कारवाई करणाऱ्या पथकाला महाराष्ट्र सरकारने घोषित केलेले ३६ लाखांचे रोख बक्षीस मिळाले आहे. विशेष म्हणजे या कारवाईनंतर देखील परिसरात पुढील शोध आणि नक्षलविरोधी कारवाया सुरू असल्याची माहिती पोलिसांकडून देण्यात आली आहे. तसेच, सी-६० कमांडो पथक देखील परिसरात गस्त घालत असल्याची माहिती मिळत आहे.
लोकसभा निवडणुकीच्या आचारसंहिता कालावधीत विध्वंसक कारवाया करण्याच्या उद्देशाने तेलंगणातील काही माओवादी प्राणहिता नदी ओलांडून गडचिरोलीला गेल्याची विश्वसनीय माहिती काल दुपारी गडचिरोली पोलिसांना मिळाली होती. त्यामुळे पोलिसांच्या सी-६० पथकांकडून त्यांचा शोध घेतला जात असतानाच, एका पथकावर नक्षलवाद्यांनी अंदाधुंद गोळीबार केला. त्यामुळे नक्षलवाद्यांना सी-६० पथकाने जोरदार प्रत्युत्तर दिले. या चकमकीत चार नक्षल्यांचा खात्मा करण्यात आला.
दरम्यान, एसपीएस रेपनपल्लीच्या ५ किलोमीटर अंतरावर कोलामार्का पर्वतांमध्ये आज पहाटे शोध घेत असताना सी-६० पथकाचा समावेश असलेल्या एका पथकावर नक्षलवाद्यांनी अंदाधुंद गोळीबार केला. या वेळी नक्षलवाद्यांना सी-६० पथकांनी जोरदार प्रत्युत्तर दिले. गोळीबार थांबल्यानंतर आणि परिसराची झडती घेतल्यानंतर ४ पुरुष नक्षलवाद्यांचे मृतदेह सापडले आहेत. गोळीबाराच्या ठिकाणाहून एक एके ४७, एक कार्बाइन आणि २ देशी बनावटीचे पिस्तूल, नक्षलवादी साहित्य आणि सामान जप्त करण्यात आले आहे.
अशी आहेत मृतदेह सापडलेल्या नक्षलवाद्यांची नावे…
– डीव्हीसीएम वर्गेश (मांगी इंद्रावेल्ली क्षेत्र समितीचे सचिव आणि कुमुराम भीम मंचेरियल विभागीय समितीचे सदस्य)
– डीव्हीसीएम मागटू, सिरपूर चेन्नूर क्षेत्र समितीचे सचिव
– कुरसंग राजू, पलटन सदस्य
– कुडिमेट्टा व्यंकटेश, पलटन सदस्य
– पथकाला ३६ लाखांचे रोख बक्षीस
