लहू चव्हाण
पाचगणी : पाचगणी पोलीस ठाण्याच्या प्रभारी अधिकारी पदी सहाय्यक पोलीस निरीक्षक राजेश माने यांची नियुक्ती झाली असून त्यांनी पदाचा नुकताच पदभार स्वीकारला आहे. पाचगणी शहर व परिसरातील विविध क्षेत्रातील मान्यवरांनी माने यांचे स्वागत केले.
सातारा जिल्हा पोलीस प्रमुख समीर शेख यांच्याकडून जिल्ह्यांतील प्रभारी अधिकाऱ्यांच्या अंतर्गत बदल्या करण्यात आल्या. यामध्ये भुईंज,मेढा पाचगणी, पाटण,मसूर तळबीड,कोरेगांव पुसेगांव या पोलीस ठाण्यांचा सहभाग आहे. यामध्ये पाचगणीचे तत्कालीन सहाय्यक पोलीस निरीक्षक सतीश पवार यांची सातारा आर्थिक गुन्हे शाखेत बदली करण्यात आली आहे. तर त्यांच्या जागी राजेश माने यांची नियुक्ती करण्यात आली आहे.
दरम्यान, सहाय्यक पोलीस निरीक्षक सतीश पवार यांनी पाचगणी व परिसरातील ग्रामीण भागातील निवडणुका सण उत्सव या काळामध्ये कायदा-सुव्यवस्था अबधित राखण्यासाठी त्यांनी विशेष प्रयत्न केले होते. कोरोना काळातही पवार यांनी केलेले कार्य उल्लेखनीय आहे.
पाचगणी शहर व परिसरात कायदा व सुव्यवस्था अबाधित रहावी, गुन्हेगारी प्रवृत्तींना आळा बसावा, यासाठी विशेष लक्ष देणार असून नागरिकांना कुठलीही तक्रार असल्यास निसंकोचपणे माझ्याशी संपर्क साधावा. अशी माहिती प्रभारी अधिकारी सहाय्यक पोलीस निरीक्षक राजेश माने यांनी पुणे प्राईम न्यूजशी बोलताना दिली आहे.
