चेन्नई: टीम इंडियाचा स्टार फलंदाज विराट कोहली तब्बल 9 महिन्यांनंतर कसोटी क्रिकेटमध्ये परतला आहे. बांगलादेशविरुद्धच्या चेन्नई सामन्यात पहिल्या डावात विराट फ्लॉप ठरला. पहिल्या डावात केवळ 6 धावा करून तो बाद झाला. बांगलादेशचा वेगवान गोलंदाज हसन महमूदने त्याची शिकार केली. महमूदने बाहेरच्या बाजूला फुल लेन्थ चेंडू टाकला. यावर विराटने खेळायला जात यष्टिरक्षक लिटन दासकडे सोपा झेल दिला. अतिशय खराब शॉट खेळून तो पॅव्हेलियनमध्ये परतला. यासह महमूदने भारतीय संघाला तिसरा धक्का दिला. याआधी त्याने रोहित शर्मा आणि शुभमन गिलला बाद केले होते.
चुकीमुळे मैदान सोडावे लागले
विराटच्या शेवटच्या 10 कसोटी डावांवर नजर टाकली, तर त्याने चांगली कामगिरी केली आहे. त्याने दोन अर्धशतके आणि दोन शतकेही झळकावली आहेत. पण विराट जवळपास 9 महिने कसोटी सामन्यांपासून दूर होता आणि T20 क्रिकेट खेळत होता, त्याचा परिणाम चेन्नईत दिसून आला. बाहेरचा चेंडू खेळण्याच्या प्रयत्नात त्याने आपली विकेट गमावली. हसन महमूदने चेंडू शरीरापासून दूर टाकला होता, जो चौथ्या स्टंपकडे जात होता. कोहली हा चेंडू खेळायला गेला आणि 6 धावांच्या वैयक्तिक स्कोअरवर स्लिपवर आऊट झाला. याआधीही विराट चौथ्या आणि पाचव्या स्टंपच्या चेंडूवर बाद झाला आहे. पण आश्चर्याची गोष्ट म्हणजे केवळ चौथा सामना खेळताना हसन महमूदने विराटाच्या कमकुवतपणाचा फायदा घेतला.
कोहलीचा फ्लॉप शो सुरूच
2024 च्या टी-20 वर्ल्ड कपपासून विराट कोहली सतत फ्लॉप होत आहे. T20 विश्वचषकाच्या अंतिम सामन्यातील अर्धशतक वगळता तो आंतरराष्ट्रीय क्रिकेटच्या गेल्या 10 डावांमध्ये धावा करण्यात अपयशी ठरला आहे. गेल्या 10 डावांमध्ये कोहलीला केवळ एकच अर्धशतक झळकावता आले आहे. बांगलादेशपूर्वी त्याने श्रीलंकेविरुद्ध एकदिवसीय मालिका खेळली होती. श्रीलंका दौऱ्यातील 3 डावात त्याला केवळ 58 धावा करता आल्या. त्याआधी, तो T20 विश्वचषकाच्या 8 डावात केवळ 151 धावा करू शकला होता, ज्यामध्ये अंतिम फेरीतील 76 धावांचाही समावेश होता.
