मुंबई: इंडियन प्रीमियर लीग (आयपीएल) 2024 साठी मिनी लिलाव मंगळवारी (19 डिसेंबर) दुबईमध्ये झाला. आता स्पर्धेची तयारी सुरू झाली आहे. आयपीएलचा पुढील हंगाम मार्च ते मे दरम्यान खेळवला जाऊ शकतो. पण दरम्यान, मुंबई इंडियन्सला 5 वेळा चॅम्पियन बनवणारा माजी कर्णधार रोहित शर्मा चर्चेत आहे. मुंबई फ्रँचायझीने अलीकडेच रोहितच्या जागी हार्दिक पांड्याला कर्णधार म्हणून नियुक्त केले आहे. अशा स्थितीत ट्रेड विंडोनुसार रोहित मुंबईचा संघ सोडणार का? असा प्रश्न आता उपस्थित होत आहे. दरम्यान, काही चाहते आणि मीडिया रिपोर्ट्समध्ये असेही म्हटले आहे की, रोहित ट्रेड विंडो अंतर्गत चेन्नई सुपर किंग्ज (CSK) संघात जाऊ शकतो.
चेन्नई फ्रँचायझीचे रोहितबाबत मोठे वक्तव्य
महेंद्रसिंग धोनी चेन्नई संघाचे नेतृत्व करत आहे. पण या सर्व बातम्यांदरम्यान चेन्नई फ्रँचायझीने अशा बातम्या फेटाळून लावल्या. फ्रँचायझीचे सीईओ काशी विश्वनाथन यांनी सांगितले की, त्यांची टीम रोहितला घेण्याच्या मूडमध्ये नाही. या सर्व बातम्या अफवा आहेत.
विश्वनाथन म्हणाले, ‘मुख्यतः आम्ही खेळाडूंचा व्यापार करत नाही आणि आमच्याकडे मुंबई इंडियन्ससोबत ट्रेड करण्यासाठी खेळाडूही नाहीत. आम्ही त्यांच्याशी संपर्क साधला नाही आणि आमचा हेतूही नाही. चेन्नई संघ एमआय खेळाडूंचा ट्रेड करू पाहत असल्याच्या मीडिया वृत्तांचे त्यांनी खंडन केले.
रोहित, सूर्या आणि बुमराह मुंबई संघ सोडत नाहीत
अलीकडेच क्रिकबझनेही रोहितबाबत एक रिपोर्ट प्रसिद्ध केला होता. मुंबई इंडियन्सशी संबंधित एका अधिकाऱ्याचा हवाला देत त्याने लिहिले की, रोहित शर्मा, सूर्यकुमार यादव आणि जसप्रीत बुमराह यांच्याबाबत मीडियामध्ये अनावश्यक बातम्या येत आहेत. ते कुठेही जात नसून मुंबई संघ या सर्व खेळाडूंना सोबत ठेवणार आहे. या अधिकाऱ्याने असेही सांगितले की, हार्दिक पांड्याला कर्णधार बनवण्याचा निर्णय घेण्यापूर्वी सर्व खेळाडूंची संमती घेण्यात आली होती, ज्यामध्ये स्वतः रोहितचाही समावेश होता. त्यामुळे इतर सर्व गोष्टी निरुपयोगी आहेत. प्रत्येक खेळाडूने हा निर्णय मान्य केला आहे.
रोहितच्या कामगिरीत घसरण
2013 पासून मुंबईचे कर्णधारपद भूषवत रोहितने मुंबई इंडियन्सला 5 वेळा आयपीएल चॅम्पियन बनवले. आयपीएलच्या गेल्या दोन हंगामात रोहितचा फॉर्म खूपच खराब राहिला आहे. रोहितने 2023 IPL मध्ये 16 सामन्यात 20.75 च्या सरासरीने आणि 132.80 च्या स्ट्राईक रेटने 332 धावा केल्या. 2022 मध्ये, त्याने 14 सामन्यांमध्ये 19.14 च्या सरासरीने आणि 120.18 च्या स्ट्राइक रेटने 268 धावा केल्या. रोहितच्या फॉर्ममध्ये सरासरीच्या बाबतीत निश्चित घसरण झाली आहे.
