Rohit Sharma : टीम इंडियाने आयसीसी टी 20 वर्ल्ड कप जिंकून कोट्यावधी भारतीयांचे स्वप्न साकार केले आहे. भारताने टी 20 वर्ल्ड कप 2024 फायनलमध्ये दक्षिण आफ्रिकेवर 7 धावांनी अफलातून विजय मिळवला. टीम इंडियाने दक्षिण आफ्रिकेच्या हातचा विजयाचा घास हिसकावला आहे. टीम इंडियाने दक्षिण आफ्रिकेला विजयासाठी 177 धावांचं आव्हान दिलं होतं. मात्र टीम इंडियाच्या भेदक गोलंदाजी आणि अफलातून क्षेत्ररक्षणाच्या जोरावर मॅच आपल्याकडे खेचून घेतली. टीम इंडियाने यासह रोहित शर्माच्या नेतृत्वात टी 20 वर्ल्ड कप ट्रॉफीवर नाव कोरलं. रोहित शर्माची ही कॅप्टन म्हणून पहिली आणि खेळाडू म्हणून दुसरी टी 20 वर्ल्ड कप ट्रॉफी ठरली.
टीम इंडियाच्या या ऐतिहासिक विजयानंतर अनुभवी फलंदाज आणि माजी कर्णधार विराट कोहलीने टी 20 क्रिकेटमधून निवृत्त होत असल्याचं जाहीर केलं आहे. त्यानंतर आता रोहित शर्माबाबत मोठी बातमी समोर आली आहे. कॅप्टन रोहित शर्मा यानेही टी 20 क्रिकेटमधून निवृत्ती घेण्याचा निर्णय घेतला आहे. आयसीसीने सोशल मीडियावरुन याबाबतची माहिती दिली आहे.
विराट कोहलीने विजयानंतर बोलताना आपण क्रिकेटच्या या छोट्या फॉर्मेटमधून निवृत्त होत असल्याचं जाहीर केलं. त्यानंतर दुसऱ्या बाजूला टीम इंडियाच्या खेळाडूंनी विजयाचा जल्लोष करायला सुरुवात केली. प्रत्येकाने एकमेकांना गळाभेट देत अभिनंदन केलं. तेव्हा भारतीय खेळाडूंचा कंठ दाटून आला होता, डोळ्यात आनंदाश्रू होते. मात्र काही वेळाने रोहित शर्मानेही विराट पाठोपाठ टी 20 क्रिकेटमधून निवृत्त होत असल्याचं जाहीर केलं. विराट-रोहितसारखी अनुभवी आणि आजी माजी कर्णधारांची जोडी निवृत्त झाल्याने क्रिकेट चाहत्यांमध्ये नाराजीचं वातावरण दिसून आल आहे.
दरम्यान विराट कोहली आणि रोहित शर्मा या दोघांनी टी 20 फॉर्मेटमधून निवृत्तीनंतर वनडे आणि टेस्ट क्रिकेटमध्ये खेळणार असल्याचं स्पष्ट केलं आहे. विराट आणि रोहितच्या या निर्णयामुळे आता टी 20 क्रिकेटमध्ये आणखी नव्या आणि युवा खेळाडूंना संधी मिळणार आहे. तसेच आता रोहितनंतर हार्दिक पंड्या पूर्णवेळ कर्णधार असल्याचंही निश्चित झालं आहे.
रोहित शर्माची टी20 कारकीर्द..
रोहितने इंग्लंड विरुद्ध 19 सप्टेंबर 2007 रोजी टी 20 पदार्पण केले होतं. रोहितने आतापर्यंत एकूण 159 सामन्यांमध्ये 140.89 च्या स्ट्राईक रेटने आणि 31.34च्या एव्हरेजने 4 हजार 231 धावा केल्या. रोहितने या दरम्यान 5 शतकं आणि 32 अर्धशतकं झळकावली आहेत. तसेच रोहितची 121 ही सर्वोच्च धावसंख्या आहे. तर रोहितने एकमेव विकेटही घेतली आहे.
