लोणी काळभोर, ता. ३१ : लोणी काळभोर (ता. हवेली) येथील एमआयटी ज्युनिअर कॉलेजच्या अकरावी व बारावीच्या विद्यार्थ्यांनी तालुकास्तरीय कुस्ती व बुद्धिबळासह क्रिकेट स्पर्धेत बाजी मारली. तालुकास्तरीय व जिल्हास्तरीय स्पर्धेत घवघवीत यश मिळविल्याने विजेत्या खेळाडूंचे लोणी काळभोर व परिसरातून नागरिकांकडून कौतुकाचा वर्षाव होत आहे.
लोणी कंद (ता. हवेली) येथे नुकत्याच तालुकास्तरीय विविध स्पर्धा पार पडल्या. या स्पर्धेत विद्यालयाचा बारावीचा विद्यार्थी निशांत काळभोर यांनी ७९ किलो वजन गटात तर अकरावीचा विद्यार्थी ऋषिकेश काळभोर याने ७० किलो वजन गटात सुवर्णपदक पटकाविले आहे.
एमआयटीतील अकरावीच्या विद्यार्थिनी तनिष्का दुंडे हिने बुद्धिबळ स्पर्धेत प्रथम तर मनस्वी गायकवाड हिने चतुर्थ क्रमांक पटकाविला आहे. मुलांच्या बुद्धिबळ स्पर्धेत आर्यन शिंदे याने तृतीय तर ओम मुंढे याला पाचव्या क्रमांकावर समाधान मानावे लागले आहेत. फुलगाव (पुणे) येथील जिल्हास्तरीय क्रिकेट स्पर्धेत मुलांनी उपविजेते पद पटकावले आहे. यशस्वी विद्यार्थ्यांना क्रीडा शिक्षक जोतीराम कौलगे यांच्या मार्गदर्शन मिळाले.
दरम्यान, विजेत्या खेळाडूंचे एमआयटी ज्युनिअर कॉलेजच्या प्राचार्या रिपल शर्मा यांनी सत्कार करून अभिनंदन केले. तसेच पुढील वाटचालीसाठी शुभेच्छा दिल्या.
