पुणे : अंगात दैवीशक्तीचा संचार असल्याचा बनाव करून कौटुंबिक वाद सोडवून देण्याचे आमिष दाखवत एका भोंदूने महिलेवर लैंगिक अत्याचार केल्याचा धक्कादायक प्रकार उघडकीस आला आहे. याचबरोबर बांधकाम व्यवसायात गुंतवणुकीवर मोठा परतावा मिळवून देण्याचे आमिष दाखवत संबंधित भोंदूने तब्बल 50 लाख 55 हजार रुपये उकळल्याचेही समोर आले आहे. या प्रकरणी स्वारगेट पोलिसांनी गुन्हा दाखल करून तपास सुरू केला आहे.
औदुंबर मनोहर गडदे (वय 43, रा. तरटगाव, ता. पंढरपूर, जि. सोलापूर) असे आरोपीचे नाव असून, एका 42 वर्षीय महिलेने याबाबत तक्रार दिली आहे. पोलिसांनी दिलेल्या माहितीनुसार, पीडित महिला आणि तिच्या पतीमध्ये कौटुंबिक वाद असल्याने ते वेगळे राहत होते. सुमारे पाच वर्षांपूर्वी एका ओळखीच्या व्यक्तीमार्फत तिची आरोपीशी ओळख झाली.
या ओळखीचा फायदा घेत आरोपीने स्वतःला ‘देवऋषी’ असल्याचे भासवले. “माझ्या अंगात दैवीशक्ती आहे, मी तुमचे कौटुंबिक प्रश्न सोडवू शकतो,” असा विश्वास संपादन करून त्याने महिलेला आपल्या जाळ्यात ओढले. त्यानंतर आरोपीने स्वारगेट परिसरातील एका लॉजवर बोलावून तिच्यावर लैंगिक अत्याचार केला. पुढे लोणेरे, उत्तेखोल आणि माणगाव परिसरातील विविध लॉजवर बोलावून वेळोवेळी अत्याचार केल्याचे तक्रारीत नमूद आहे.
याच काळात आरोपीने महिलेला नोकरी लावण्याचे तसेच बांधकाम व्यवसायात गुंतवणूक केल्यास चांगला परतावा मिळवून देण्याचे आमिष दाखवले. मे 2021 पासून त्याने रोख रक्कम आणि दागिन्यांच्या स्वरूपात टप्प्याटप्प्याने 50 लाख 55 हजार रुपये उकळले.
दरम्यान, आपली फसवणूक झाल्याचे लक्षात आल्यानंतर संबंधित महिलेने 11 एप्रिल रोजी स्वारगेट पोलिस ठाण्यात तक्रार दाखल केली. या प्रकरणाचा पुढील तपास पोलीस करत असून आरोपीच्या इतर गुन्ह्यांचाही तपास सुरू असल्याची माहिती पोलिसांकडून देण्यात आली आहे.
