मुंबई: टीम इंडियाचा स्टार यष्टीरक्षक फलंदाज केएल राहुल नुकत्याच झालेल्या श्रीलंका दौऱ्यावर एकदिवसीय संघाचा भाग होता. त्याला या मालिकेत खेळण्याची संधीही मिळाली. या सगळ्या दरम्यान, केएल राहुलबद्दल एक बातमी सोशल मीडियावर व्हायरल होत आहे, ज्यामध्ये असा दावा केला जात आहे की, त्याने व्यावसायिक क्रिकेटमधून निवृत्ती जाहीर केली आहे. यासोबतच एका इंस्टाग्राम स्टोरीचा स्क्रीनशॉटही व्हायरल होत आहे, जो केएल राहुलच्या इंस्टाग्राम अकाउंटचा असल्याचे सांगण्यात येत आहे.
केएल राहुल आंतरराष्ट्रीय क्रिकेटमधून निवृत्त?
सोशल मीडियावर व्हायरल होत असलेल्या इंस्टाग्राम स्टोरीच्या स्क्रीनशॉटमध्ये म्हटले आहे की, खूप विचार केल्यानंतर मी व्यावसायिक क्रिकेटमधून निवृत्ती जाहीर करण्याचा निर्णय घेतला आहे. हा निर्णय सोपा नव्हता, कारण अनेक वर्षांपासून खेळ हा माझ्या आयुष्याचा महत्त्वाचा भाग आहे. माझ्या संपूर्ण कारकिर्दीत माझे कुटुंब, मित्र, सहकारी आणि चाहत्यांकडून मला मिळालेल्या समर्थन आणि प्रोत्साहनाबद्दल मी अत्यंत आभारी आहे.
मैदानावर आणि मैदानाबाहेर मला मिळालेले अनुभव आणि आठवणी खरोखरच अनमोल आहेत. माझ्या देशाचे प्रतिनिधित्व करणे आणि अनेक प्रतिभावान व्यक्तींसोबत खेळणे हा माझा सन्मान आहे. मी पुढच्या नवीन अध्यायासाठी उत्सुक असताना, मी नेहमीच खेळासाठी माझा वेळ घालवीन. या अविश्वसनीय प्रवासात सहभागी झाल्याबद्दल सर्वांचे आभार, असंही त्या पोस्टमध्ये नमूद करण्यात आले आहे.
पण, केएल राहुलने ही इन्स्टाग्राम स्टोरी त्याच्या अकाउंटवर पोस्ट केलेली नाही. अलीकडे, एक इंस्टाग्राम स्टोरी शेअर करताना, त्याने लिहिले की, माझ्याकडे एक घोषणा करायची आहे. ज्यानंतर चाहते सोशल मीडियावर वेगवेगळे अंदाज लावत आहेत. दरम्यान, या सगळ्यामध्ये ही खोटी इन्स्टाग्राम स्टोरी सोशल मीडियावर व्हायरल झाली आहे.
KL Rahul Announced His Retirement From International Cricket
All the best for new journey #KLrahul pic.twitter.com/PTLqo8IsLy— Sai Adabala (@adabala_d) August 22, 2024
राहुलची आतापर्यंतची कारकीर्द
केएल राहुलने 2014 मध्ये त्याच्या आंतरराष्ट्रीय कारकिर्दीला सुरुवात केली. सध्या तो केवळ 32 वर्षांचा आहे. आतापर्यंत त्याने टीम इंडियासाठी 50 कसोटी, 77 एकदिवसीय आणि 72 टी-20 सामने खेळले आहेत. त्याने कसोटीत 2863 धावा, एकदिवसीय सामन्यात 2851 धावा आणि T20 मध्ये 2265 धावा केल्या आहेत. याशिवाय तो आयपीएलमधील लखनऊ सुपर जायंट्स संघाचा कर्णधारही आहे.
