पुणे: बांगलादेशने भारतासमोर 257 धावांचे लक्ष्य ठेवले आहे. नाणेफेक जिंकून प्रथम फलंदाजीला आलेल्या बांगलादेशी संघाने 50 षटकांत 8 गडी गमावून 256 धावा केल्या. बांगलादेशकडून तनजीद हसनने 43 चेंडूत 51 धावा केल्या. तर लिटन दासने 82 चेंडूत 66 धावांचे योगदान दिले. मुशफिकुर रहीमने 46 चेंडूत 38 धावांची खेळी केली. महमुदुल्लाहनेही 36 चेंडूत 46 धावांचे योगदान दिले. भारताकडून जसप्रीत बुमराह, मोहम्मद सिराज आणि रवींद्र जडेजाने २-२ बळी घेतले. याशिवाय शार्दुल ठाकूर आणि कुलदीप यादव यांना प्रत्येकी 1 यश मिळाले.
चांगल्या सुरुवातीनंतर बांगलादेशी संघ कोलमडला…
नाणेफेक जिंकून फलंदाजीला आलेल्या बांगलादेशची सुरुवात चांगली झाली. बांगलादेशचे सलामीवीर तनजीद हसन आणि लिटन दास यांनी पहिल्या विकेटसाठी 14.4 षटकांत 93 धावा जोडल्या. मात्र, यानंतर बांगलादेशी फलंदाज सतत बाद होत राहिले. त्यामुळे बांगलादेशचा संघ केवळ 256 धावांपर्यंत मजल मारू शकला. वास्तविक, एकेकाळी बांगलादेशी संघ 300 हून अधिक धावा करण्यात यशस्वी होईल असे वाटत होते, परंतु भारतीय गोलंदाजांनी शानदार पुनरागमन केले.
हार्दिक पांड्याच्या दुखापतीमुळे टीम इंडियाच्या अडचणी वाढल्या
त्याचवेळी हार्दिक पंड्याच्या दुखापतीमुळे भारतीय संघ व्यवस्थापनाच्या अडचणी वाढल्या आहेत. हार्दिक पांड्या भारतासाठी नववे षटक टाकण्यासाठी आला, मात्र अवघे 3 चेंडू टाकल्यानंतर तो जखमी झाला. यानंतर हार्दिक पांड्याला मैदान सोडावे लागले. हार्दिक पांड्या फलंदाजीला येणार नाही. मात्र, हार्दिक पांड्याची दुखापत हा टीम इंडियासाठी मोठा धक्का मानला जात आहे.
तर टीम इंडिया पॉइंट टेबलमध्ये अव्वल
सध्या भारतीय संघ गुणतालिकेत दुसऱ्या स्थानावर आहे. मात्र टीम इंडिया बांगलादेशला हरवण्यात यशस्वी ठरल्यास पॉइंट टेबलमध्ये अव्वल स्थानावर पोहोचू शकते. न्यूझीलंड 4 सामन्यांत 8 गुणांसह गुणतालिकेत अव्वल स्थानावर आहे. भारताचे 3 सामन्यांनंतर 6 गुण आहेत. त्याचबरोबर बांगलादेश गुणतालिकेत सहाव्या स्थानावर आहे. बांगलादेशचे 3 सामन्यांतून 2 गुण आहेत.
हेही वाचा:
मोठी बातमी! 1 नोव्हेंबरपासून ऊसाचा गळीत हंगाम सुरु होणार
Narayan Rane : मी 96 कुळी मराठा, कुठलाही मराठा कुणबी दाखला घेणार नाही: नारायण राणे
