IND vs ENG धर्मशाला : धर्मशाला कसोटीत भारताने इंग्लंडचा पराभव केला आहे. पाचव्या कसोटीत इंग्रजांना एक डाव आणि 64 धावांनी मानहानीकारक पराभव स्वीकारावा लागला. पहिल्या डावात 259 धावांनी पिछाडीवर पडल्यानंतर इंग्लंडचा संघ दुसऱ्या डावात 195 धावांत आटोपला. अशा प्रकारे भारताने ही मालिका 4-1 अशी जिंकली आहे. दुसऱ्या डावात इंग्लंडसाठी फक्त जो रूटला थोडासा संघर्ष करता आला. याशिवाय बाकीचे इंग्लिश फलंदाज भारतीय गोलंदाजांसमोर हतबल आणि असहाय्य दिसत होते. विशेषत: टीम इंडियाच्या फिरकीपटूंचे इंग्लिश फलंदाजांकडे उत्तर नव्हते.
‘बेसबॉल’ पुन्हा फ्लॉप
इंग्लंडकडून दुसऱ्या डावात जो रूटने सर्वाधिक धावा केल्या. त्याने 84 धावांची चांगली खेळी केली. पण ब्रिटिश टॉप ऑर्डर पुन्हा सपशेल फसली. सलामीवीर जॅक क्रोली एकही धाव न काढता रवी अश्विनच्या चेंडूवर बाद झाला. बेन डकेट 2 धावा करून बाद झाला. ओली पोप 19 धावा करून पॅव्हेलियनमध्ये परतला. मात्र, जॉनी बेअरस्टोने 39 धावांची छोटी पण चांगली खेळी खेळली. इंग्लिश कर्णधार बेन स्टोक्स 2 धावा करून बाद झाला. त्यानंतर बेन फॉक्सला रवी अश्विनने स्वस्तात बोल्ड केले.
रवी अश्विन 100व्या कसोटीत चमकला
दुसऱ्या डावात भारतासाठी रवी अश्विन हा सर्वात यशस्वी गोलंदाज ठरला. रवी अश्विनने 5 फलंदाजांना बाद केले. जसप्रीत बुमराह आणि कुलदीप यादव यांना प्रत्येकी 2 यश मिळाले. रवींद्र जडेजाने शोएब बशीरला बाद केले.
पहिल्या कसोटीतील पराभवानंतर जबरदस्त पलटवार
भारताने 5 कसोटी सामन्यांची मालिका 4-1 अशी जिंकली आहे. मात्र, या मालिकेची सुरुवात भारतासाठी चांगली झाली नाही. पहिल्या कसोटीत इंग्लंडने भारताचा पराभव केला, मात्र त्यानंतर टीम इंडियाने शानदार पुनरागमन केले. विशाखापट्टणम नंतर भारताने राजकोट, रांची आणि धर्मशाला येथे इंग्रजांचा सहज पराभव केला.
रोहित शर्मा आणि शुभमन गिल यांनी शतके झळकावली
भारतीय संघाने पहिल्या डावात 477 धावा केल्या भारताला 259 धावांची मोठी आघाडी मिळाली. भारताकडून रोहित शर्मा आणि शुभमन गिल यांनी शतके झळकावली. रोहित शर्माने 103 धावा केल्या, तर शुभमन गिलने 110 धावांचे योगदान दिले. याशिवाय देवदत्त पडिकल आणि सरफराज खान यांनी अर्धशतक केले. इंग्लंडकडून शोएब बशीर सर्वात यशस्वी गोलंदाज ठरला. शोएब बशीरला 5 यश मिळाले. जेम्स अँडरसन आणि टॉम हार्टलीने 1-1 विकेट घेतली. बेन स्टोक्सने रोहित शर्माला बाद केले.
भारतीय फिरकीपटूंसमोर इंग्लिश फलंदाज फ्लॉप
नाणेफेक जिंकून प्रथम फलंदाजीला आलेल्या इंग्लंडने 218 धावा केल्या. इंग्लंडकडून सलामीवीर जॅक क्रॉलीने सर्वाधिक 79 धावा केल्या. पण याशिवाय एकाही इंग्लिश फलंदाजाला पन्नास धावांचा टप्पा ओलांडता आला नाही. पहिल्या डावात भारतासाठी कुलदीप यादव सर्वात यशस्वी गोलंदाज ठरला. कुलदीप यादवने 5 बळी घेतले. रवी अश्विनला 4 यश मिळाले. रवींद्र जडेजाने जो रूटला बाद केले.
