Ind vs Pak Cricket Match : विश्वचषकातील लो स्कोअरिंग सामन्यात पाकिस्तानच बाजी मारेल असं वाटत असताना, मात्र भारताने पाकिस्तानवर सहा धावांनी रोमांचक विजय मिळवला. भारताचा हा विश्वचषकातील दुसरा विजय ठरला. या विजयासोबत भारताने पाकिस्तानचा सहा धावांनी पराभव करत सुपर 8 च्या दिशेने पाऊल टाकलेय. भारतीय संघ प्रथम फलंदाजी करताना फलंदाजांच्या हराकिरीमुळे 119 धावांतच ऑलआऊट झाला. विजयासाठी 120 धावांचा पाठलाग करताना पाकिस्तानकडून जबरदस्त सुरुवात झाली.
भारताच्या विजायाची शक्यता फक्त 8 टक्के असल्याचं सांगितलं जात होतं. परंतु भारतीय गोलंदाजांनी अखेरच्या काही षटकात मात्र सामना फिरवला. हार्दिक पांड्या, अक्षर पटेल, जसप्रती बुमराह, मोहम्मद सिराज आणि अर्शदीप सिंह यांनी अचूक टप्प्यावर भेदक मारा करत सामना आपल्याकडे खेचून आणला. भारताचा तेजतर्रार गोलंदाज जसप्रीत बुमराहने 15 व्या षटकात मोहम्मद रिझवान याचा त्रिफाळा उडवत पाकिस्तानकडून मॅच माघारी आणली. हाच सामन्याचा टर्निंग पॉइंट होता. 120 धावांचा पाठलाग करताना पाकिस्तानने आक्रमक सुरुवात केली खरी, पण पाकिस्ताचे फलंदाज जास्त वेळ मैदानावर तग धरू शकले नाहीत.
तिसऱ्या षटकात जसप्रीत बुमराहने बाबर आझमला बाद करत भारताला पहिले यश मिळवून दिले. दुसऱ्या बाजूला मात्र मोहम्मद रिझवान तळ ठोकून उभाच होता. त्यानं आपला अनुभव कामी आणत पाकिस्तानला विजयाच्या दिशेने नेलं होतं. दुसऱ्या बाजूला विकेट पडत होत्या, पण रिझवान चिवट फलंदाजी करत होता. पाकिस्तानला 48 चेंडूत फक्त 48 धावांची गरज होती. सामना पाकिस्तानच जिंकणार असे सर्वांना वाटत होते. पण 15 व्या षटकात जसप्रीत बुमराहने रिझवानचा त्रिफाळा उडवला अन् भारताच्या विजयाच्या आशा जिवंत केल्या. हार्दिक पांड्या, अक्षर पटेल, जसप्रती बुमराह, मोहम्मद सिराज आणि अर्शदीप सिंह यांनी अचूक टप्प्यावर भेदक मारा करत भारताचा विजय निश्चित केला.
