हैदराबाद: हैदराबादमध्ये इंग्लंडविरुद्ध खेळली गेलेली पहिली कसोटी भारताने गमावली आहे. या सामन्यात यजमान भारताला 28 धावांनी पराभव स्वीकारावा लागला आहे. सामन्यात जवळपास मागे पडलेल्या इंग्लंडने ऑली पोपच्या 196 धावांच्या खेळीमुळे शानदार पुनरागमन केले. यानंतर, उर्वरित काम इंग्लिश फिरकी गोलंदाज टॉम हार्टलीने केले, जो पहिलीच कसोटी खेळत होता. हार्टलीने 1 किंवा 2 नाही तर 7 विकेट घेतल्या.
या सामन्यात प्रथम फलंदाजी करताना इंग्लंडचा संघ 246 धावांवर आटोपला. प्रत्युत्तरात भारताने पहिल्या डावात 436 धावा ठोकल्या. त्यानंतर दुसऱ्या डावात फलंदाजी करताना इंग्लंडने 420 धावा फलकावर लावल्या आणि भारतासमोर 231 धावांचे लक्ष्य ठेवले. लक्ष्याचा पाठलाग करताना भारताच्या दुसऱ्या डावात 202 धावा झाल्या.
दुसऱ्या डावात फलंदाजीला आलेला इंग्लंड संघ 190 धावांनी मागे होता. इंग्लंडची चांगली सुरुवात झाली, पण सतत विकेट पडणे ही त्यांच्यासाठी मोठी समस्या होती. इंग्लिश संघाने 163 धावांवर 5 विकेट गमावल्या होत्या. मात्र, यावेळी तिसऱ्या क्रमांकावर आलेला ओली पोप क्रीझवर उपस्थित होता. त्यानंतर पोपने बेन फॉक्ससह सहाव्या विकेटसाठी 112 धावांची भागीदारी करत संघाला 275 धावांपर्यंत नेले, तेव्हा फॉक्सच्या रूपाने डावातील सहावी विकेट गमावली.
त्यानंतर तिसऱ्या दिवस अखेरीस इंग्लंडने 316/6 अशी मजल मारली होती आणि यावेळी ऑली पोप 148 धावा करून क्रीजवर नाबाद होता. त्यानंतर चौथ्या दिवशी फलंदाजीला उतरलेल्या इंग्लंडचा दुसरा डाव ४२० धावांवर संपुष्टात आला. यादरम्यान ओली पोपने 278 चेंडूंत 21 चौकारांच्या मदतीने 196 धावा केल्या.
टीम इंडियाला 231 धावांचे लक्ष्य गाठता आले नाही
लक्ष्याचा पाठलाग करणाऱ्या भारतीय संघाला कर्णधार रोहित शर्मा आणि यशस्वी जैस्वाल यांनी चांगली सुरुवात करून दिली. दोघांनी पहिल्या विकेटसाठी 42 धावा जोडल्या, त्यानंतर 12व्या षटकाच्या चौथ्या चेंडूवर जैस्वालच्या रूपाने भारताला पहिला धक्का बसला. जैस्वालने 35 चेंडूत 2 चौकारांच्या मदतीने 15 धावा केल्या. त्यानंतर फलंदाजीला आलेला शुभमन गिल दुसऱ्या चेंडूवर खाते न उघडता बाद झाला.
यानंतर चांगली खेळी खेळणारा कर्णधार रोहित शर्मा 18व्या षटकात टॉम हार्टलीच्या चेंडूवर बाद झाला. त्यानंतर पाचव्या क्रमांकावर फलंदाजी करणारा अक्षर पटेल 30व्या षटकात बाद झाला. 3 चौकारांच्या मदतीने 17 धावा करून बाद झालेल्या अक्षरच्या रूपाने भारताने चौथी विकेट गमावली. काही वेळानंतर केएल राहुल 22 धावा करून पॅव्हेलियनमध्ये परतला. राहुलच्या रूपाने भारताने पाचवी विकेट गमावली.
भारताच्या विकेट्स पडण्याचा सिलसिला इथेच थांबली नाही. संघाला सहावा धक्का रवींद्र जडेजाच्या (02) रूपाने 39व्या षटकात 119 धावांवर बसला. जडेजा धावबाद झाला. त्यानंतर 41व्या षटकात श्रेयस अय्यर (13) पॅव्हेलियनमध्ये परतला. यानंतर केएस भरतने आपली विकेट गमावली, त्याने 3 चौकारांच्या मदतीने 28 धावा केल्या. त्यानंतर भारताला 64व्या षटकात 177 धावांवर रविचंद्रन अश्विनच्या रूपाने नववा धक्का बसला. यानंतर सिराज आणि बुमराहने शेवटच्या विकेटसाठी 25 धावांची भागीदारी केली, मात्र ते संघाला विजयापर्यंत नेऊ शकले नाहीत.
टॉम हार्टलीने इंग्लंडसाठी आश्चर्यकारक कामगिरी केली
टॉम हार्टलीने पहिलीच कसोटी खेळताना एकूण 7 भारतीय फलंदाजांना आपले बळी बनवले. यादरम्यान त्याने 26.2 षटकात 62 धावा दिल्या. याशिवाय जो रूट आणि जॅक लीच यांना 1-1 असे यश मिळाले.
