मुंबई: भारतीय क्रिकेट नियामक मंडळ (बीसीसीआय) देशांतर्गत क्रिकेटमध्ये मोठा बदल करणार आहे. भारताच्या 2024-25 देशांतर्गत हंगामात अनेक मोठे बदल होणार आहेत, ज्यामध्ये नाणेफेक रद्द करण्याचा प्रस्ताव देखील समाविष्ट आहे. 2024-25 हंगामासाठी देशांतर्गत क्रिकेट कॅलेंडरची पुनर्रचना करण्याचा मसुदा प्रस्ताव बोर्डाच्या सर्वोच्च परिषदेकडे पाठवण्यात आला असल्याची माहिती आहे. बीसीसीआयचे सचिव जय शाह, भारतीय कर्णधार रोहित शर्मा, निवड समितीचे अध्यक्ष अजित आगरकर, मुख्य प्रशिक्षक राहुल द्रविड आणि राष्ट्रीय क्रिकेट अकादमीचे प्रमुख व्हीव्हीएस लक्ष्मण यांच्याशी चर्चा केल्यानंतर हा प्रस्ताव देण्यात आला आहे.
सीके नायडू ट्रॉफीमध्ये बदल होऊ शकतात
मीडिया रिपोर्ट्सनुसार, बीसीसीआय सीके नायडू ट्रॉफीमधून टॉस काढून टाकण्याचा विचार करत आहे. तसेच ही स्पर्धा नवीन पॉइंट सिस्टमसह आयोजित केली जाईल. या प्रस्तावानुसार, सीके नायडू ट्रॉफीमध्ये नाणेफेक पद्धत रद्द केली जाईल आणि पाहुण्या संघाला प्रथम फलंदाजी किंवा गोलंदाजी करण्याचा पर्याय असेल. हंगामाच्या शेवटी सीके नायडू ट्रॉफीसाठी नियोजित केलेल्या नवीन गुण प्रणालीच्या परिणामकारकतेचेही बोर्ड मूल्यांकन करेल आणि रणजी ट्रॉफीच्या आगामी हंगामात त्याची अंमलबजावणी करता येईल का? याचा निर्णय घेईल.
रणजी ट्रॉफी दोन टप्प्यात आयोजित केली जाणार आहे. यानुसार, 2024-25 हंगामातील सय्यद मुश्ताक अली टी-20 ट्रॉफी आणि विजय हजारे ट्रॉफी एकदिवसीय स्पर्धा या व्हाईट-बॉल टूर्नामेंटच्या आधी आणि नंतर आयोजित केली जाईल. या प्रस्तावानुसार, देशांतर्गत हंगाम दुलीप ट्रॉफीने सुरू होईल, ज्यामध्ये राष्ट्रीय निवडकर्त्यांनी निवडलेल्या चार संघांचा समावेश असेल. इराणी चषकानंतर दुलीप ट्रॉफी आणि त्यानंतर रणजी ट्रॉफीचा पहिला टप्पा होणार आहे. रणजी ट्रॉफीच्या नवीन प्रस्तावित फॉरमॅटनुसार, लीग स्टेजनंतर, सय्यद मुश्ताक अली ट्रॉफी आणि विजय हजारे ट्रॉफी यासारख्या मर्यादित फॉरमॅटच्या स्पर्धा असतील. उर्वरित दोन रणजी लीग सामने आणि बाद फेरीचे सामने मर्यादित षटकांच्या स्पर्धेनंतर होणार आहेत. हिवाळ्याच्या महिन्यांमध्ये देशाच्या उत्तरेकडील भागात खराब हवामानामुळे उद्भवलेल्या आव्हानांना तोंड देणे, तसेच सामन्यांमधले मोठे अंतर सुनिश्चित करणे हे यामागचे कारण आहे.
बीसीसीआयने हेही लक्षात ठेवले आहे की, गेल्या मोसमातील रणजी ट्रॉफीमध्ये दोन सामन्यांमध्ये केवळ तीन दिवसांचे अंतर होते. यात प्रवासाचाही समावेश होता, ज्यामुळे खेळाडूंना विश्रांती आणि ताजेतवाने होण्यासाठी पुरेसा वेळ मिळत नव्हता. बीसीसीआयचे सचिव जय शाह म्हणाले, ‘खेळाडूंना ताजेतवाने होण्यासाठी आणि संपूर्ण हंगामात अव्वल कामगिरी राखण्यासाठी पुरेसा वेळ देण्यासाठी सामन्यांमधील अंतर वाढवले जाईल. सीके नायडू ट्रॉफीमध्ये समतोल राखण्याच्या उद्देशाने नवीन गुण प्रणाली लागू केली जाईल. यामध्ये पहिल्या डावातील फलंदाजी आणि गोलंदाजीतील गुणांचा समावेश आहे. याशिवाय पहिल्या डावातील आघाडी किंवा विजयासाठीचे गुणही समाविष्ट आहेत. महिला क्रिकेटमधील ODI, T20 आणि बहु-दिवसीय स्वरूपाच्या स्पर्धांसह सर्व आंतर-झोनल स्पर्धांमध्ये राष्ट्रीय निवडकर्त्यांद्वारे संघांची निवड केली जाईल.
