बंगळुरु : न्यूझीलंड क्रिकेट टीमने टॉम लॅथमच्या नेतृत्वात इतिहास रचला असून न्यूझीलंडने टीम इंडियाचा 8 विकेट्सने पराभव केला आहे. न्यूझीलंडने भारत दौऱ्यातील कसोटी मालिकेची विजयाने सुरुवात केली आहे. न्यूझीलंडने बंगळुरुतील पहिल्या कसोटी सामन्यात टीम इंडियावर 8 विकेट्सने विजय मिळवला असून 3 सामन्यांच्या मालिकेत 1-0 अशी आघाडी घेतली आहे. टीम इंडियाने न्यूझीलंडला विजयासाठी 107 धावांचं आव्हान दिलं होतं. न्यूझीलंडने हे आव्हान 27.4 ओव्हरमध्ये 2 विकेट्स गमावून पूर्ण केलं. न्यूझीलंडचा हा भारतातील तिसरा आणि 1988 नंतरचा पहिला विजय ठरला.
रचीन रवींद्र ठरला विजयाचा शिल्पकार..
शतकवीर रचीन रवींद्र हा न्यूझीलंडच्या विजयाचा शिल्पकार ठरला आहे. रचीनने पहिल्या आणि दुसर्‍या डावात निर्णायक खेळी करत न्यूझीलंडच्या विजयाचा पाया रचला. रचीनने दुसऱ्या डावात नाबाद 39 धावा केल्या. तर पहिल्या डावात टीम साऊथीसोबत आठव्या विकेटसाठी 137 धावांची बाजी पलटणारी पार्टनरशीप केली होती. रचीनने पहिल्या डावात शतकी खेळी केली होती, रचीनचं हे भारतातील पहिलं तर कसोटी कारकीर्दीतील दुसरं शतक ठरलं आहे. रचीनने पहिल्या डावात 157 बॉलमध्ये 134 रन्स केल्या.
नेमकं सामन्यात काय झालं?
पहिला दिवस हा पावसामुळे वाया गेला. दुसऱ्या दिवशी टीम इंडियाने टॉस जिंकून बॅटिंगचा निर्णय केला मात्र न्यूझीलंडने पहिल्या डावात रोहितसेनेला 46 रन्सवर सर्वबाद केले. त्यानंतर न्यूझीलंडने पहिल्या डावात 402 धावा करत 356 धावांची भक्कम आघाडी घेतली. न्यूझीलंडने 233 वर 7 वी विकेट गमावली होती. मात्र रचीन आणि टीम साऊथी या दोघांनी आठव्या विकेटसाठी 137 धावांची भागीदारी केली. त्यामुळे न्यूझीलंडला 400 पार पोहचता आलं. न्यूझीलंडकडून पहिल्या डावात रचीन व्यतिरिक्त डेव्हॉन कॉनव्हे याने 91 तर टीम साऊथीने 65 धावा जोडल्या. तर टीम इंडियाकडून रवींद्र जडेजा आणि कुलदीप यादव या दोघांनी प्रत्येकी 3-3 विकेट्स घेतल्या. मोहम्मद सिराजने दोघांना आऊट केलं. तर जसप्रीत बुमराह आणि आर अश्विन या दोघांना 1-1 विकेट मिळाली.
टीम इंडिया प्लेइंग ईलेव्हन : रोहित शर्मा (कर्णधार), केएल राहुल, यशस्वी जयस्वाल, विराट कोहली, सर्फराज खान, ऋषभ पंत (विकेटकीपर), रवींद्र जडेजा, रवीचंद्रन अश्विन, कुलदीप यादव, जसप्रीत बुमराह आणि मोहम्मद सिराज.
न्यूझीलंड प्लेइंग ईलेव्हन : टॉम लॅथम (कॅप्टन), विल यंग, रचीन रवींद्र, डेव्हॉन कॉनवे, डॅरिल मिचेल, टॉम ब्लंडेल (विकेटकीपर), ग्लेन फिलिप्स, मॅट हेन्री, टीम साउथी, एजाझ पटेल आणि विल्यम ओरूर्के.
