सिडनी : टी २० विश्वकरंडक स्पर्धेतील श्रीलंका संघाचा खेळाडू असणाऱ्या दनुष्का गुणथिलका याला सिडनी पोलिसांनी एका स्थानिक महिलेचे लैगिक शोषण केल्या प्रकरणी अटक केली आहे. पोलिसांनी रविवारी पहाटे एकच्या सुमारास दनुष्का गुणथिलका याला ससेक्स स्ट्रीट हॉटेलमध्ये जाऊन अटक केल्याचे समजते.स्थानिक पोलिसांनी या वृत्ताला दुजोरा दिला आहे.
गुणथिलकाने महिलेवर रोझ बे येथील तिच्याच घरात बलात्कार केला, असा आरोप महिलेकडून आहे. एका ऑनलाईन डेटिंग अँप च्या माध्यमातून या दोघांची भेट झाली असून गेल्या आठवड्यात दनुष्का त्या महिलेला भेटण्यासाठी तिच्या घरी गेला होता. यावेळी दनुष्काने त्या महिलेवर बलात्कार केला, असे त्या महिलेने नोंदविलेल्या तक्रारीत म्हटले आहे. बलात्कार केल्यामुळे त्याला जामीन देखील नाकारण्यात आल्याची खात्रीशीर माहिती आहे. सिडनी पोलीस त्याला न्यायालयात हजर करणार असल्याचे वृत्त आहे.
श्रीलंका संघ स्पर्धेतून बाहेर पडला आहे. शनिवारी दक्षिण आफ्रिकेविरुद्धच्या लढतीत तो संघासोबत असल्याने त्याला अटक करण्यात आली नव्हती. मात्र सामना संपल्यावर सिडनी पोलिसांनी त्याला ताब्यात घेत जेरबंद केले. त्यामुळे श्रीलंका संघ दनुष्का गुणथिलका शिवायच मायदेशी परतला.
