पॅरिस: पॅरिस ऑलिम्पिकमध्ये भारताचा अमन सेहरावत कुस्तीच्या अंतिम फेरीत पोहोचू शकला नाही. अमनला उपांत्य फेरीत जपानच्या कुस्तीपटूकडून अवघ्या 1 मिनिट 14 सेकंदात पराभवाला सामोरे जावे लागले आणि त्यामुळे अंतिम फेरी गाठण्याच्या त्याच्या आशा धुळीला मिळाल्या. मात्र, असे असतानाही अमनला कांस्यपदक जिंकण्याची संधी आहे. उपांत्य फेरीत अमनची स्पर्धा जागतिक क्रमवारीत अव्वल क्रमांकाचा कुस्तीपटू असलेल्या जपानच्या रे हिगुचीशी होती, ज्याने एकही गुण न गमावता अमनचा पराभव केला आणि दुसऱ्यांदा अंतिम फेरीत प्रवेश केला.
अमनने त्याच्या सुरुवातीच्या फेरीच्या सामन्यांमध्ये चांगली कामगिरी केली होती आणि 3 वेळच्या विश्वविजेत्याला पराभूत करून उपांत्य फेरी गाठली होती. त्याची सर्वात कठीण परीक्षा उपांत्य फेरीत होती आणि त्यावर मात करणे त्याच्यासाठी अशक्य असल्याचे सिद्ध झाले. जपानच्या हिगुचीने वेळ न घालवता त्याचा 10-0 असा पराभव केला. हिगुचीने २०१६ च्या रिओ ऑलिम्पिकमध्ये रौप्य पदक जिंकले होते. याशिवाय, गेल्या वर्षीच त्याने जागतिक स्पर्धेत रौप्यपदक जिंकले होते.
