पुणे : मित्रांसोबत गप्पा मारत थांबल्याच्या कारणावरुन तरुणाला बेदम मारहाण करण्यात आल्याची घटना स्वारगेट परिसरात घडली आहे. याप्रकरणी स्वारगेट पोलिसांनी चार जाणांवर गुन्हा दाखल केला आहे. कुऱ्हाडीच्या दांडक्याने व ट्युबलाईटने तरूणाला मारहाण करुन गंभीर जखमी करण्यात आले.
मारहाणीचा हा प्रकार शुक्रवारी (दि.16) रात्री साडेनऊ वाजण्याच्या सुमारास गुलटेकडी परिसरातील एकदिल मित्र मंडळाजवळ घडला. या हल्ल्यात निखिल लगाडे (वय-19 रा. मिनाताई ठाकरे वसाहत, गुलटेकडी, पुणे) जखमी झाला आहे. आनंद उमाप व त्याचा भाऊ यश उमाप यांच्यासह दोन जणांवर गुन्हा दाखल करण्यात आला आहे. आयपीसी 324, 504, 506, 34 सह क्रिमिनल लॉ अमेंडमेंट अॅक्ट, महाराष्ट्र पोलीस कायद्यांतर्गत चौघांवर गुन्हा दाखल करण्यात आला आहे.
मिळालेल्या माहितीनुसार, फिर्यादी निखिल लगाडे हा मित्रांसोबत गुलटेकडी परिसरातील एकदिल मित्र मंडळाजवळ गप्पा मारत थांबला होता. त्यावेळी आरोपी त्या ठिकाणी आले. त्यांनी फिर्यादी व त्यांच्या मित्रांना तुम्ही येथे का थांबलात अशी विचारणा केली. त्यानंतर हातातील कुऱ्हाडीच्या दांडक्याने व ट्युबलाईटने त्यांना विनाकारण मारहाण केली. यामध्ये निखिल याच्या हाताला गंभीर दुखापत झाली आहे. आरोपींकडून परिसरात दहशत निर्माण करण्याचा प्रयत्न असल्याचे फिर्यादीने म्हटले आहे.
