पुणे : पुण्यातील स्वारगेट एसटी बस स्थानकाच्या आवारात बसच्या धडकेत प्रवासी तरुणाचा मृत्यू झाल्याची घटना घडली आहे. याप्रकरणी एसटी बसचालकाविरुद्ध गु्न्हा दाखल करण्यात आला आहे. प्रवीण बालाजी कोका (वय-२८, रा. हैद्राबाद, तेलंगणा) असे मृत्युमुखी पडलेल्या तरुणाचे नाव आहे. ही घटना शुक्रवारी सकाळी आठच्या सुमारास घडली आहे. याबाबत अमर चकराल (वय-४४, रा. बिबवेवाडी) यांनी स्वारगेट पोलीस ठाण्यात फिर्याद दिली आहे. त्यानुसार पोलिसांनी एसटी बसचालकाविरुद्ध गुन्हा दाखल केला आहे.
पोलिसांनी दिलेल्या माहितीनुसार, प्रवीण कोका हे सोलापूर जिल्ह्यातील मोहोळ परिसरात कामाला होते. ते दिवाळीनिमित्त बिबवेवाडी येथे राहणाऱ्या आत्याला भेटायला आले होते. शुक्रवारी सकाळी आठच्या सुमारास तो सोलापूरहून आलेल्या बसमधून एसटी स्थानकात उतरले. तेथून कोका हे बिबवेवाडीकडे निघाले होते.
त्यावेळी एसटी स्थानकाच्या प्रवेशद्वारावरच एसटी बसने प्रवीणला जोरदार धडक दिली. या अपघातात गंभीर जखमी झालेल्या प्रवीणला तातडीने रुग्णालयात दाखल करण्यात आले. मात्र उपचारांपूर्वीच त्याचा मृत्यू झाला. भरधाव बस चालवून प्रवाशाच्या मृत्यूस जबाबदार ठरल्याप्रकरणी एसटी बसचालकाविरुद्ध गुन्हा दाखल करण्यात आला आहे. या घटनेचा पुढील तपास पोलीस उपनिरीक्षक बी. पी. शिरसाट करत आहेत.
