पुणे : पुण्यातील हडपसर परिसरात एक धक्कादायक प्रकार उघडकीस आला आहे. कोल्डड्रिंक मध्ये गुंगीकारक पदार्थ टाकून तरुणीवर बलात्कार केल्याची घटना घडली आहे. धक्कादायक बाब म्हणजे शारीरिक संबंध ठेवतानाचे व्हिडिओ काढून ते सोशल मीडियावर व्हायरल करण्याची धमकी देखील दिली. हा प्रकार सप्टेंबर 2022 ते 8 मार्च 2024 या कालावधीत हडपसर, अंबरनाथ आणि जत, सांगली येथील लॉजमध्ये घडला आहे.
याबाबत मुंबई येथील 22 वर्षीय तरुणीने हडपसर पोलीस ठाण्यात सोमवारी फिर्य़ाद दिली आहे. त्यावरून हडपसर पोलिसांनी सांगली येथे राहणाऱ्या तरुणावर गुन्हा दाखल केला आहे. दऱ्याबा साऊबा साळे (रा. विठ्ठल नगर, जत, जि. सांगली) अस गुन्हा दाखल करण्यात आलेल्या तरुणाच नाव आहे.
पोलिसांनी दिलेल्या माहितीनुसार, पीडित तरुणी आणि आरोपी एका तालुक्यातील आहेत. आरोपीने तरुणीला लग्नाचे आमिष दाखवून तिला हॉटेलमध्ये जेवणासाठी घेऊन गेला. कोल्डड्रिंक मध्ये गुंगीकारक पदार्थ टाकून तिला बेशुद्ध केले. त्यानंतर लॉजवर घेऊन जात तिच्यासोबत शारीरिक संबंध ठेवले. तसेच शारीरिक संबंध ठेवतानाचे व्हिडिओ तयार केले. ते व्हिडिओ पीडित तरुणीला पाठवून तिला वेगवेगळ्या ठिकाणी बोलावून घेत शारीरिक संबंध प्रस्थापित केले. या प्रकारानंतर पीडित तरुणीने आरोपीशी संपर्क करणे कमी केले.
याचा राग आल्याने आरोपीने मुलीला शारीरिक संबंध ठेवतानाचे व्हिडिओ सोशल मीडियावर व्हायरल करण्याची धमकी दिली. तसेच पीडित तरुणीच्या आईला फोन करुन शिवीगाळ करुन जीवे मारण्याची धमकी दिल्याचे फिर्य़ादीत म्हटले आहे. पुढील तपास पोलीस निरीक्षक मंगल मोढवे करीत आहेत.
