पुणे : पुण्यातील हडपसर परिसरातील साडेसतरा नळी येथील दांगट वस्ती येथे महिलेला मारहाण केल्याची घटना घडली आहे. पाण्याच्या हंड्यात कुत्र्याने तोंड घातल्याने महिलने त्याच्या अंगावर पाणी टाकल्याने ४ जणांनी महिलेच्या मुलाला शिवीगाळ करत दगडाने मारहाण करुन जखमी केल्याचा प्रकार समोर आला आहे. तसेच महिलेचे केस धरुन तिच्यासोबत अश्लील वर्तन करुन विनयभंग केला आहे. ही घटना २० फेब्रुवारीला दुपारी बारा वाजण्याच्या सुमारास घडली.
याबाबत दांगट वस्ती येथे राहणाऱ्या ४९ वर्षीय महिलेने हडपसर पोलीस ठाण्यात फिर्याद दिली आहे. यावरुन दिलीप बाबुराव जाधव (वय-६६), शुभम दिलीप जाधव (वय-२८), शंभो दिलीप जाधव (वय-२४) शुभम जाधव याचा अनोळखी मित्रावर गुन्हा दाखल करण्यात आला आहे.
याबाबत अधिक माहिती अशी की, आरोपी आणि फिर्याद एकमेकांच्या ओळखीचे असून शेजारीच राहायला आहेत. आरोपी यांच्या पाळीव कुत्र्याने फिर्यादी यांनी पाण्याने भरुन ठेवलेल्या हंड्यात तोंड घातले. यामुळे कुत्र्याला हाकलण्यासाठी फिर्यादी यांनी कुत्र्याच्या अंगावर पाणी टाकून कुत्र्याला बांधून ठेवा असे आरोपींना सांगितले.
याचा राग आल्याने आरोपी यांनी फिर्यादी यांच्या मुलाला शिवीगाळ करुन हाताने आणि दगडाने बेदम मारहाण केली. तसेच फिर्यादी यांचे केस धरून ओढत स्त्री मनास लज्जा उत्पन्न होईल असे गैरवर्तन केले. याप्रकरणी गुन्हा दाखल केला असून पुढील तपास पोलीस करत आहेत.
